ബൈ ബൈ ഗ്ലാസ്ഗോ, ഹലോ അഹമ്മദാബാദ്; 2030 കോമൺവെൽത്ത് ഗെയിംസിന് തയ്യാറെടുത്ത് അഹമ്മദാബാദ്

ഗ്ലാസ്ഗോ: 2026 കോമൺവെൽത്ത് ഗെയിംസിന് ഇന്ന് ഔദ്യോഗികമായി സമാപനമാവുകയാണ്. ഇന്ത്യൻ സമയം പുലർച്ചെ 1:30ന് നടക്കുന്ന പ്രൗഢഗംഭീരമായ ചടങ്ങുകളോടെ ഈ വർഷത്തെ കായികമാമാങ്കത്തിന് തിരശീല വീഴുമ്പോൾ, കോമൺവെൽത്ത് ഫ്ലാഗും ഹോസ്റ്റ് ബാറ്റണും അടുത്ത ആതിഥേയരായ ഇന്ത്യയ്ക്ക് കൈമാറും. 2030-ലെ കോമൺവെൽത്ത് ഗെയിംസിന് വേദിയാകുന്നത് ഗുജറാത്തിലെ അഹമ്മദാബാദാണ്. മാനുഷി ചില്ലർ, ഋഷഭ് ശർമ, ശങ്കർ മഹാദേവൻ എന്നിവരടങ്ങുന്ന പ്രമുഖരുടെ കലാവിരുന്നുകളാണ് സമാപന ചടങ്ങിന് മാറ്റുകൂട്ടുക.

​ഈ വർഷത്തെ ഗെയിംസിൽ മിന്നുന്ന പ്രകടനത്തോടെ ഇന്ത്യ മെഡൽ പട്ടികയിൽ നിലവിൽ നാലാം സ്ഥാനം സ്വന്തമാക്കിയിട്ടുണ്ട്. 13 സ്വർണവും 17 വെള്ളിയും 9 വെങ്കലവുമടക്കം ആകെ 39 മെഡലുകളാണ് ഇന്ത്യയുടെ സമ്പാദ്യം. ബോക്സിങ് ഇനങ്ങളിൽ ഇന്ത്യൻ താരങ്ങൾ കാഴ്ചവെച്ച അസാധാരണ പ്രകടനമാണ് രാജ്യത്തിന്റെ മെഡൽ നേട്ടത്തിൽ നിർണായക കരുത്തായത്.

​കായികശക്തികളുടെ പോരാട്ടത്തിൽ 158 മെഡലുകളുമായി ഓസ്‌ട്രേലിയയാണ് പട്ടികയിൽ ഒന്നാം സ്ഥാനത്ത് നിലയുറപ്പിച്ചത്. 65 സ്വർണവും 42 വെള്ളിയും 52 വെങ്കലവുമാണ് ഓസ്ട്രേലിയയുടെ അക്കൗണ്ടിലുള്ളത്. 26 സ്വർണവും 41 വെള്ളിയും 35 വെങ്കലവുമടക്കം 102 മെഡലുകൾ നേടിയ ഇംഗ്ലണ്ട് രണ്ടാം സ്ഥാനത്തും, 18 സ്വർണവും 20 വെള്ളിയും 21 വെങ്കലവുമായി 59 മെഡലുകളോടെ കാനഡ മൂന്നാം സ്ഥാനത്തുമുണ്ട്. ആതിഥേയരായ സ്കോട്ട്‌ലൻഡ് 13 സ്വർണവും 8 വെള്ളിയും 17 വെങ്കലവുമായി അഞ്ചാം സ്ഥാനത്താണ് ഫിനിഷ് ചെയ്തത്.