കോമൺവെൽത്ത് ഗെയിംസ്: പാര അത്‌ലറ്റിക്സ് 100 മീറ്ററിൽ സ്വർണവും വെള്ളിയും ഇന്ത്യയ്ക്ക്, ലോങ്ജമ്പിൽ ശ്രീശങ്കറിന് വെള്ളി

ഗ്ലാസ്ഗോ: 2026 കോമൺവെൽത്ത് ഗെയിംസിൽ പാര അത്‌ലറ്റിക്സ് 100 മീറ്റർ (T47) വിഭാഗത്തിൽ സ്വർണവും വെള്ളിയും തൂത്തുവാരി ഇന്ത്യയുടെ മിന്നും പ്രകടനം. ദിലിപ് ഗാവിത്ത് ഇന്ത്യയ്ക്കായി സ്വർണ മെഡൽ സ്വന്തമാക്കിയപ്പോൾ, മുഹമ്മദ് ബേസിൽ വെള്ളി മെഡൽ നേടി രാജ്യത്തിന്റെ തിളക്കം ഇരട്ടിയാക്കി. മത്സരത്തിന്റെ അവസാന നിമിഷങ്ങളിൽ അത്ഭുതകരമായ വേഗത കൈവരിച്ചാണ് ദിലിപ് ഒന്നാമനായി സ്വർണത്തിലേക്ക് കുതിച്ചെത്തിയത്. ഇതോടെ ഗെയിംസിൽ ഇന്ത്യയുടെ ആകെ മെഡൽ നേട്ടം പതിനഞ്ചായി ഉയർന്നു.

​ഇതേദിവസം നടന്ന ലോങ്ജമ്പ് മത്സരത്തിൽ മലയാളി താരം എം. ശ്രീശങ്കറും ഇന്ത്യയ്ക്കായി വെള്ളി മെഡൽ നേട്ടം കൊയ്തു. 8.09 മീറ്റർ ചാടിക്കടന്നാണ് ശ്രീശങ്കർ വെള്ളി മെഡലിന് അർഹനായത്. തുടർന്നുള്ള അവസരങ്ങളിൽ സ്വർണ ദൂരം മറികടക്കാൻ താരം പരമാവധി ശ്രമിച്ചെങ്കിലും ലക്ഷ്യത്തിലെത്താൻ സാധിച്ചില്ല. ഈ ഇനത്തിൽ 8.15 മീറ്റർ ദൂരം കണ്ടെത്തിയ ജമൈക്കൻ താരം സ്വർണവും, 8.08 മീറ്റർ ചാടിയ ആതിഥേയരായ സ്കോട്ട്‌ലൻഡ് താരം വെങ്കല മെഡലും സ്വന്തമാക്കി.