കേരള സ്റ്റേറ്റ് ഹാൻഡ്ബോൾ സബ്ജൂനിയർ ചാമ്പ്യൻഷിപ്പ്: ബ്രോഷർ പ്രകാശനം ചെയ്തു

കോഴിക്കോട്: കുന്ദമംഗലം ഹയർസെക്കൻഡറി സ്കൂളിൽ ജൂലായ് 31, ഓഗസ്റ്റ് ഒന്ന്, രണ്ട് തീയതികളിൽ നടക്കാനിരിക്കുന്ന കേരള സ്റ്റേറ്റ് ഹാൻഡ്ബോൾ സബ്ജൂനിയർ ചാമ്പ്യൻഷിപ്പിന്റെ ഔദ്യോഗിക ബ്രോഷർ പ്രകാശനം ചെയ്തു‌. മാതൃഭൂമി ചെയർമാനും മാനേജിങ് എഡിറ്ററുമായ പി.വി. ചന്ദ്രൻ, ഹാൻഡ് ബോൾ അസോസിയേഷൻ ജില്ലാ പ്രസിഡന്റ് കെ. ജയപ്രശാന്ത് ബാബുവിന് ബ്രോഷർ നൽകിയാണ് പ്രകാശന കർമ്മം നിർവഹിച്ചത്.

​യുവജനങ്ങളെ ലഹരി വിപത്തിൽനിന്ന് മാറ്റിനിർത്താൻ സ്പോർട്സിന് മാത്രമേ സാധിക്കുകയുള്ളൂവെന്നും, അതിനാൽ ഇത്തരം ചാമ്പ്യൻഷിപ്പ് മത്സരങ്ങളെ പ്രോത്സാഹിപ്പിക്കേണ്ടത് ഈ കാലഘട്ടത്തിന്റെ വലിയൊരു അനിവാര്യതയാണെന്നും ചടങ്ങിൽ സംസാരിക്കവെ പി.വി. ചന്ദ്രൻ അഭിപ്രായപ്പെട്ടു.

​ചാമ്പ്യൻഷിപ്പിന്റെ വിജയകരമായ നടത്തിപ്പിനായി സംഘടിപ്പിച്ച ചടങ്ങിൽ ഹാൻഡ് ബോൾ അസോസിയേഷൻ ജില്ലാ വൈസ് പ്രസിഡൻ്റ് ബാബു ചെറിയാടത്ത്, ജില്ലാ ട്രഷറർ ആഷിഖ് വിശ്വനാഥൻ, ജില്ലാ സെക്രട്ടറി രാജേഷ് പി. മാങ്കാവ് എന്നിവർ പങ്കെടുത്തു സംസാരിച്ചു.