തട്ടോളിക്കര യുവധാര കലാവേദി ഫിലിം സൊസൈറ്റിക്ക് മിനി തിയറ്റർ; സത്യജിത് റേ ചിത്രപ്രദർശനത്തോടെ ഉദ്ഘാടനം

തട്ടോളിക്കര: ചലച്ചിത്രാസ്വാദനത്തിനും സിനിമാപഠന പ്രവർത്തനങ്ങൾക്കും പുതിയ അധ്യായം കുറിച്ച് തട്ടോളിക്കര യുവധാര കലാവേദി ഫിലിം സൊസൈറ്റിയുടെ മിനി തിയറ്റർ ഉദ്ഘാടനം ചെയ്തു. കുട്ടികൾക്കായി ഒരുക്കിയ കളിസ്ഥലത്തോട് അനുബന്ധിച്ച് നിർമ്മിച്ച ഹാളിലാണ് മിനി തിയറ്റർ സജ്ജീകരിച്ചിരിക്കുന്നത്.

പ്രശസ്ത സിനിമാ നിരൂപകൻ വാണിമേൽ കുഞ്ഞിക്കണ്ണൻ മിനി തിയറ്റർ ഉദ്ഘാടനം ചെയ്തു. കലാവേദി സെക്രട്ടറി രഞ്ജിത്ത് സ്വാഗതം പറഞ്ഞ ചടങ്ങിൽ പ്രസിഡന്റ് നിമിഷാ വിശ്വൻ അധ്യക്ഷത വഹിച്ചു.

ഫിലിം സൊസൈറ്റി സെക്രട്ടറി സോമസുന്ദരൻ പ്രവർത്തന റിപ്പോർട്ട് അവതരിപ്പിച്ചു. വിവിധ അക്കാദമിക് പരീക്ഷകളിൽ മികച്ച വിജയം നേടിയ വിദ്യാർഥികളെ സുരേന്ദ്രൻ കവുത്യാട്ട് അനുമോദിച്ചു.

സുദർശനൻ, ഷാജി കെ. കൊളറാട്, സുധീർകുമാർ, ഫൽകെ പ്രേമൻ, വാർഡ് അംഗം ശശികുമാർ എന്നിവർ ആശംസകൾ നേർന്നു.

ഉദ്ഘാടനച്ചടങ്ങിന് ശേഷം ലോകപ്രശസ്ത സംവിധായകൻ സത്യജിത് റേയുടെ സിനിമയുടെ പ്രത്യേക പ്രദർശനവും സംഘടിപ്പിച്ചു. പുതിയ മിനി തിയറ്ററിലെ ആദ്യ പ്രദർശനമായതിനാൽ ചടങ്ങിന് പ്രത്യേക ശ്രദ്ധേയതയുണ്ടായി.

തുടർന്ന് നടന്ന ജനറൽബോഡി യോഗത്തിൽ യുവധാര കലാവേദി ഫിലിം സൊസൈറ്റിയുടെ പുതിയ എക്സിക്യൂട്ടീവ് കമ്മിറ്റിയെ തെരഞ്ഞെടുത്തു.

പ്രാദേശികതലത്തിൽ ഗുണമേൻമയുള്ള സിനിമകളുടെ പ്രദർശനം, ചലച്ചിത്ര സംവാദങ്ങൾ, സിനിമാപഠന ക്ലാസുകൾ, കുട്ടികൾക്കും യുവജനങ്ങൾക്കും സിനിമയെ അടുത്തറിയാനുള്ള അവസരങ്ങൾ എന്നിവ ലക്ഷ്യമിട്ടാണ് മിനി തിയറ്റർ പ്രവർത്തനം ആരംഭിച്ചതെന്ന് സംഘാടകർ അറിയിച്ചു.