അൺസ്റ്റോപ്പബിൾ മൊറോക്കോ; ഷൂട്ടൗട്ടിൽ നെതർലൻഡ്സിനെ തകർത്ത് പ്രീ-ക്വാർട്ടറിൽ

തീപാറിയ നോക്കൗട്ട് പോരാട്ടത്തിൽ മുൻ ചാമ്പ്യന്മാരായ നെതർലൻഡ്‌സിനെ ഷൂട്ടൗട്ടിൽ വീഴ്ത്തി മൊറോക്കോ 2026 ഫിഫ ലോകകപ്പിന്റെ പ്രീ-ക്വാർട്ടറിലേക്ക് യോഗ്യത നേടി. നിശ്ചിത സമയത്തും അധിക സമയത്തും ഇരുടീമുകളും ഓരോ ഗോൾ വീതമടിച്ച് (1-1) സമനില പാലിച്ചതോടെയാണ് മത്സരം ഷൂട്ടൗട്ടിലേക്ക് നീണ്ടത്. പെനാൽറ്റി ഷൂട്ടൗട്ടിൽ 3-2 എന്ന സ്കോറിനായിരുന്നു മൊറോക്കോയുടെ നാടകീയ വിജയം. ഇസ്മായിൽ സായ്ബാരിയാണ് ഷൂട്ടൗട്ടിൽ മൊറോക്കോയുടെ വിജയഗോൾ കുറിച്ചത്. ടൂർണമെന്റിൽ ഇതുവരെ പരാജയമറിയാതെ മുന്നേറുന്ന മൊറോക്കോ കനത്ത പോരാട്ടത്തിനൊടുവിലാണ് ഓറഞ്ചുപടയെ പൂട്ടിക്കെട്ടിയത്.

​മത്സരത്തിന്റെ ആദ്യപകുതിയിൽ മൊറോക്കോയാണ് അപകടകരമായ മുന്നേറ്റങ്ങൾ നടത്തിയത്. ബോക്സിന് പുറത്തുനിന്ന് അഷ്റഫ് ഹക്കീമി തൊടുത്ത ലോങ് റേഞ്ചർ ഉൾപ്പെടെയുള്ള രണ്ട് സുവർണ്ണ അവസരങ്ങൾ ഡച്ച് ഗോൾകീപ്പർ ബാർട്ട് വെർബ്രുഗൻ മികച്ച രീതിയിൽ പ്രതിരോധിച്ചു. മൊറോക്കോയുടെ ഇസ്മായിൽ സായ്ബാരിക്കും ലഭിച്ച അവസരങ്ങൾ ലക്ഷ്യത്തിലെത്തിക്കാനായില്ല. മറുവശത്ത് നെതർലൻഡ്‌സിന്റെ മിക്ക് വാൻ ഡി വെൻ തൊടുത്ത ശക്തമായ ലോങ് റേഞ്ചർ മൊറോക്കൻ ഗോൾകീപ്പർ യാസിൻ ബോണോയും തടുത്തിട്ടതോടെ ആദ്യപകുതി ഗോൾരഹിതമായി അവസാനിച്ചു.

​രണ്ടാം പകുതിയിൽ പകരക്കാരനായി ഇറങ്ങിയ വൗട്ട് വെഗോസ്റ്റിന്റെയും ടിജാനി റെയ്ൻഡേഴ്സിന്റെയും നീക്കങ്ങളിലൂടെ നെതർലൻഡ്സ് മത്സരത്തിൽ പിടിമുറുക്കി. ഇതിന്റെ ഫലമായി 71-ാം മിനിറ്റിൽ കോഡി ഗാക്പോയിലൂടെ നെതർലൻഡ്സ് ആദ്യ ഗോൾ നേടി. ഡച്ച് പട വിജയം ഉറപ്പിച്ചെന്ന് കരുതിയ നിമിഷത്തിൽ, മത്സരത്തിന്റെ ഇഞ്ചുറി ടൈമിൽ ഇസ ദിയോപിലൂടെ മൊറോക്കോ ഗോൾ മടക്കിയതോടെ കളി അധിക സമയത്തേക്ക് (എക്സ്ട്രാ ടൈം) നീണ്ടു. എക്സ്ട്രാ ടൈമിലും ഇരുടീമുകളും മികച്ച കളി പുറത്തെടുത്തതോടെയാണ് വിജയികളെ നിർണയിക്കാൻ ഷൂട്ടൗട്ട് വേണ്ടിവന്നത്.