അഞ്ജു ബോബി ജോർജിന്റെ 22 വർഷം പഴക്കമുള്ള റെക്കോർഡ് തകർത്തു; ലോങ് ജമ്പിൽ ചരിത്രക്കുതിപ്പുമായി ആൻസി സോജൻ

കോഴിക്കോട്: ഇന്ത്യൻ അത്‌ലറ്റിക്സ് ചരിത്രത്തിൽ പുതിയ അധ്യായമെഴുതി മലയാളി ലോങ് ജമ്പ് താരം ആൻസി സോജൻ. ഇതിഹാസ താരം അഞ്ജു ബോബി ജോർജിന്റെ 22 വർഷം പഴക്കമുള്ള ദേശീയ റെക്കോർഡാണ് ആൻസി മറികടന്നത്. ഭുവനേശ്വറിൽ നടക്കുന്ന അന്തർ സംസ്ഥാന ദേശീയ അത്‌ലറ്റിക്സ് ചാമ്പ്യൻഷിപ്പിൽ 6.88 മീറ്റർ ദൂരം ചാടിയാണ് ഏഷ്യൻ ഗെയിംസ് വെള്ളി മെഡൽ ജേതാവ് കൂടിയായ ആൻസി ഈ അവിശ്വസനീയ നേട്ടം കൈവരിച്ചതും ദേശീയ കിരീടം സ്വന്തമാക്കിയതും. 2004 ഓഗസ്റ്റ് 27-ന് ഏഥൻസ് ഒളിമ്പിക്സിന്റെ ഫൈനലിൽ അഞ്ചാം സ്ഥാനം നേടിക്കൊണ്ട് അഞ്ജു ബോബി ജോർജ് കുറിച്ച 6.83 മീറ്റർ എന്ന റെക്കോർഡാണ് ആൻസിക്ക് മുന്നിൽ വഴിമാറിയത്.

​മത്സരത്തിന്റെ തുടക്കം മുതൽ തന്നെ മികച്ച ഫോമിലായിരുന്ന ആൻസി, ആദ്യ ശ്രമത്തിൽ 6.73 മീറ്റർ ചാടിക്കൊണ്ടാണ് തുടക്കമിട്ടത്. തുടർന്ന് മുൻ ശ്രമങ്ങളിലെ പിഴവുകൾ തിരുത്തി അഞ്ചാം ശ്രമത്തിലാണ് താരം 6.88 മീറ്റർ എന്ന ചരിത്ര ദൂരത്തിലേക്ക് പറന്നിറങ്ങിയത്. അവസാന ശ്രമത്തിൽ 6.69 മീറ്റർ ദൂരത്തോടെ മത്സരം അവസാനിപ്പിച്ച ആൻസി, ഈ തകർപ്പൻ പ്രകടനത്തോടെ ഏഷ്യൻ ഗെയിംസിനും യോഗ്യത നേടി. ഫൗൾ ജമ്പുകൾ ഇല്ലാതെ മത്സരം പൂർത്തിയാക്കുക എന്നതായിരുന്നു തന്റെ പ്രാഥമിക ലക്ഷ്യമെന്നും, അതിലൂടെ മികച്ചൊരു ദൂരം താണ്ടാൻ സാധിച്ചതിൽ വലിയ സന്തോഷമുണ്ടെന്നും ആൻസി പ്രതികരിച്ചു.

​കഴിഞ്ഞ കുറച്ചുകാലമായി കടുത്ത വ്യക്തിഗത പ്രതിസന്ധികളിലൂടെയും കരിയറിലെ ഉയർച്ചതാഴ്ചകളിലൂടെയുമാണ് ആൻസി കടന്നുപോയത്. ഹോർമോൺ സംബന്ധമായ പ്രശ്നങ്ങൾ കാരണം ശരീരഭാരം നിയന്ത്രിക്കുക എന്നത് താരത്തിന് വലിയ വെല്ലുവിളിയായിരുന്നു. ഭക്ഷണ കാര്യത്തിൽ കടുത്ത നിയന്ത്രണങ്ങൾ കൊണ്ടുവരേണ്ടി വരികയും കഠിനമായി പരിശീലിക്കുകയും ചെയ്തു. ഒരു മികച്ച പ്രകടനം പുറത്തെടുക്കണമെങ്കിൽ വലിയ ത്യാഗങ്ങളും അച്ചടക്കവും വേണമെന്ന് തനിക്ക് അറിയാമായിരുന്നുവെന്നും, മികച്ചൊരു അത്‌ലറ്റാകാൻ കഠിനമായി പരിശീലിക്കണമെന്ന് കോച്ച് അനൂപ് ജോസഫ് എപ്പോഴും ഓർമ്മിപ്പിച്ചിരുന്നുവെന്നും ആൻസി പറഞ്ഞു. ആ കഠിനാധ്വാനത്തിന്റെ ഫലമാണ് ഇപ്പോൾ ട്രാക്കിൽ കാണാൻ കഴിഞ്ഞതെന്നും താരം കൂട്ടിച്ചേർത്തു.