പ്രായം തോറ്റു, കാലം നിശ്ചലമായി; 41-ാം വയസിലും ചരിത്രം കുറിച്ച് റൊണാൾഡോ

ന്യൂയോര്‍ക്ക്: വിമർശകർക്ക് കളിക്കളത്തിൽ തന്‍റെ ബൂട്ടുകൾ കൊണ്ട് മറുപടി നൽകുന്ന ശീലം ക്രിസ്റ്റ്യാനോ റൊണാൾഡോ എന്ന ഇതിഹാസം 2026 ലോകവേദിയിലും ആവർത്തിക്കുകയാണ്. പ്രായം വെറുമൊരു നമ്പർ മാത്രമാണെന്ന് പ്രഖ്യാപിച്ചുകൊണ്ട്, ഹൂസ്റ്റൺ സ്റ്റേഡിയത്തിൽ ഉസ്ബെക്കിസ്ഥാനെതിരെ രണ്ട് തകർപ്പൻ ഗോളുകൾ അടിച്ചാണ് സിആർ സെവൻ വിമർശനങ്ങളുടെ വായടപ്പിച്ചത്. അവസാനിച്ചുവെന്ന് വിധി എഴുതിയവർക്ക് മുന്നിൽ കൂടുതൽ കരുത്തനായി തിരിച്ചെത്തിയ പോർച്ചുഗൽ നായകന്റെ പോരാട്ടവീര്യത്തിന് മുന്നിൽ ലോകം ഒന്നടങ്കം വീണ്ടും കൈയടിക്കുകയാണ്.

​2006-ൽ ലയണൽ മെസ്സിക്കൊപ്പം ലോകകപ്പിൽ അരങ്ങേറിയ റൊണാൾഡോ, 2006, 2010, 2014 ലോകകപ്പുകളിൽ ഓരോ ഗോളും 2018-ൽ ഹാട്രിക് ഉൾപ്പെടെ നാല് ഗോളുകളും 2022-ൽ ഖത്തറിൽ ഒരു ഗോളും സ്വന്തമാക്കിയിരുന്നു. എന്നാൽ 2026 ലോകകപ്പിൽ ഗ്രൂപ്പ് കെ പോരാട്ടത്തിൽ ഉസ്ബെക്കിസ്ഥാനെതിരെ ലക്ഷ്യം കണ്ടതോടെ പുതിയൊരു ചരിത്രമാണ് വഴിമാറിയത്. ആറ് വ്യത്യസ്ത ലോകകപ്പുകളിൽ ഗോൾ നേടുന്ന ചരിത്രത്തിലെ ആദ്യത്തെ താരമെന്ന അപൂർവ റെക്കോർഡ് ഇനി ക്രിസ്റ്റ്യാനോയ്ക്ക് സ്വന്തം.

​ഈ ഇരട്ട ഗോളുകളോടെ പോർച്ചുഗലിന്‍റെ ലോകകപ്പ് ചരിത്രത്തിലെ എക്കാലത്തെയും ഉയർന്ന ഗോൾവേട്ടക്കാരൻ എന്ന റെക്കോർഡും റൊണാൾഡോ കൈക്കലാക്കി. 1966-ലെ ഒരൊറ്റ ലോകകപ്പിൽ ഒൻപത് ഗോളുകൾ നേടി ദശാബ്ദങ്ങളായി ഈ റെക്കോർഡ് കൈവശം വെച്ചിരുന്ന സാക്ഷാൽ യുസേബിയോയെയാണ് (ആകെ 10 ലോകകപ്പ് ഗോളുകളോടെ) സിആർ സെവൻ മറികടന്നത്. ഉസ്ബെക്കിസ്ഥാനെ 5-0 ന് തകർത്ത മത്സരത്തിൽ പോർച്ചുഗലിനായി നൂനോ മെൻഡിസ്, റാഫേൽ ലിയാവോ എന്നിവരും സ്കോർ ചെയ്തു.

​ഈ പ്രകടനത്തോടെ അന്താരാഷ്ട്ര ഫുട്ബോളിൽ പോർച്ചുഗൽ ജഴ്സിയിൽ റൊണാൾഡോയുടെ ആകെ ഗോളെണ്ണം 145 ആയി ഉയർന്നു. നിലവിൽ അന്താരാഷ്ട്ര തലത്തിൽ ലയണൽ മെസിയേക്കാൾ 23 ഗോളുകൾ മുന്നിലാണ് റൊണാൾഡോ. തന്‍റെ 41-ാം വയസ്സിലും കനകകിരീടമെന്ന ഒരൊറ്റ സ്വപ്നത്തിനായി പ്രയാണം തുടരുന്ന ഈ യോദ്ധാവ്, താൻ ഇപ്പോഴും ലോകവേദിയിൽ സജീവമാണെന്ന് അടിവരയിട്ടുറപ്പിക്കുകയാണ്.