സ്കൂൾ പ്രവേശനോത്സവം: ആഭ്യന്തരമന്ത്രിക്ക് വേഗവരയിലൂടെ അവിസ്മരണീയ വരവേൽപ്പ്!

"കുട്ടികൾക്കും രക്ഷകർത്താക്കൾക്കും ഒരേപോലെ ആവേശം പകർന്ന ഒന്നായിരുന്നു പ്രവേശനോത്സവ വേദിയിലെ ഈ വരവേഗ വിസ്മയം."

സ്കൂൾ ചീഫ് പേട്രൺ കൂടിയായ ആഭ്യന്തരമന്ത്രിയെ വരയിലൂടെ വരവേറ്റ ചടങ്ങ് കുട്ടികളും രക്ഷകർത്താക്കളും ഹർഷാരവത്തോടെയാണ് സ്വീകരിച്ചത്. തുടർന്ന് മഹാത്മാ ഗാന്ധി, ജവഹർലാൽ നെഹ്‌റു, ഇന്ദിര ഗാന്ധി തുടങ്ങിയ ചരിത്രപുരുഷന്മാരുടെയും, സിനിമ താരങ്ങളായ മോഹൻലാൽ, വിജയ്, റോക്കിഭായ് എന്നിവരുടെയും ചിത്രങ്ങൾ ജിതേഷ്ജി വേദിയിൽ വരച്ചു. കുട്ടികളുടെ പ്രിയപ്പെട്ട കാർട്ടൂൺ കഥാപാത്രങ്ങളായ ഡോറ, ചോട്ടാ ഭീം ഉൾപ്പെടെ ഒരു ഡസനോളം ചിത്രങ്ങളും അദ്ദേഹം വേദിയിൽ നിമിഷങ്ങൾക്കകം പൂർത്തിയാക്കി.

ചിത്രകലയുടെ അരങ്ങിലെ ആവിഷ്കാരമായ 'വരയരങ്ങ്' എന്ന തനതുകലാരൂപത്തിന്റെ സൃഷ്ടാവായ ഡോ. ജിതേഷ്ജി പന്തളം തെക്കേക്കര സ്വദേശിയാണ്. സോഷ്യൽ മീഡിയയിൽ വൻ സ്വാധീനമുള്ള ഇദ്ദേഹത്തിന്റെ വേഗവര വീഡിയോകൾക്ക് ഇൻസ്റ്റഗ്രാമിൽ മാത്രം നിലവിൽ മൂന്നരക്കോടിയോളം കാഴ്ചക്കാരുണ്ട്.