സാവിത്രി സാബു മെമ്മോറിയൽ ജൂനിയർ റാങ്കിങ് ഷട്ടിൽ ബാഡ്‌മിന്റൺ ടൂർണമെന്റ് സമാപിച്ചു

കോഴിക്കോട് യോനക്‌സ് സൺറൈസ് സാവിത്രി സാബു മെമ്മോറിയൽ ജൂനിയർ റാങ്കിങ് ഷട്ടിൽ ബാഡ്‌മിന്റൺ ടൂർണമെന്റ് ആവേശകരമായ മത്സരങ്ങൾക്കൊടുവിൽ സമാപിച്ചു. ടൂർണമെന്റിലെ അണ്ടർ 17 ഗേൾസ് സിംഗിൾസ് വിഭാഗത്തിൽ ഹിത മരിയ ജോസും, ഡബിൾസിൽ ലെമിൻ ഫാത്തിമ-തെരേസ പ്രശാന്ത സഖ്യവും കിരീടം ചൂടി. ബോയ്‌സ് സിംഗിൾസിൽ ജോവിൻ സോജനും, ബോയ്‌സ് ഡബിൾസിൽ മുഹമ്മദ് നസ്മി-വരുൺ എസ്. നായർ സഖ്യവുമാണ് ജേതാക്കളായത്. ഇതേ വിഭാഗം മിക്‌സഡ് ഡബിൾസിൽ മുഹമ്മദ് നസ്മി-സി.എ. അക്‌സമേരി സഖ്യവും ഒന്നാം സ്ഥാനം സ്വന്തമാക്കി മികച്ച പ്രകടനം കാഴ്ചവെച്ചു.

​അണ്ടർ 15 വിഭാഗത്തിലും വാശിയേറിയ പോരാട്ടങ്ങളാണ് നടന്നത്. ഗേൾസ് സിംഗിൾസിൽ അലിന എലിസബത്ത് രാജുവും, ഡബിൾസിൽ ആഞ്ജലീന എലിസബത്ത് രാജു-കെ. സാൻവി സഖ്യവും ചാമ്പ്യന്മാരായി. ബോയ്‌സ് സിംഗിൾസിൽ ശ്രീശ്വർ ഷിജോയാണ് ഒന്നാമതെത്തിയത്. ബോയ്‌സ് ഡബിൾസിൽ സി. കാശിനാഥ്-ആർ.കെ. ഓംകാർ സഖ്യവും, മിക്സഡ് ഡബിൾസിൽ വിവാൻ ദീപു-അഫ്രീൻ ക്വാത്തൂൻ സഖ്യവും ഈ വിഭാഗത്തിൽ ജേതാക്കളായി തങ്ങളുടെ പ്രതിഭ തെളിയിച്ചു.

​വിവിധ വിഭാഗങ്ങളിൽ മികച്ച വിജയം കൈവരിച്ച കായികതാരങ്ങൾക്ക് പ്രമുഖർ പങ്കെടുത്ത ചടങ്ങിൽ സമ്മാനങ്ങൾ വിതരണം ചെയ്തു. കേരള ബാഡ്മിന്റൺ അസോസിയേഷൻ സെക്രട്ടറി മുഹമ്മദ് താരിഖ്, സാവിത്രി സാബു ട്രസ്റ്റ് ചെയർമാൻ അലോക് സാബു, സഞ്ജീവ് സാബു, കോഴിക്കോട് ബാഡ്‌മിന്റൺ അസോസിയേഷൻ പ്രസിഡന്റ് ഹരികൃഷ്ണൻ, ചീഫ് റഫറി ദിവാകരൻ, ടൂർണമെന്റ് കൺവീനർ ബിജി എന്നിവർ ചേർന്നാണ് വിജയികൾക്കുള്ള ട്രോഫികളും സമ്മാനങ്ങളും കൈമാറിയത്.