✒️ അവനവൻ ലോകം - സത്യൻ മാടാക്കര

✒️ അവനവൻ ലോകം

- സത്യൻ മാടാക്കര

തെറിയൊച്ച ഉയരുമ്പോൾ കീഴാള

വാക്കിനെവിടെ അഭയസ്ഥാനം.

കാറ്റിലുണ്ട് നിശബ്ദത

വിളക്കിലുണ്ട് ഊതിയാൽ കെടുന്ന തീ

വെള്ളത്തിലുണ്ട് കാണാത്ത ഉപ്പ്

മഞ്ഞിലുണ്ട് കാണാത്ത കാഴ്ച.

വല വീശുന്നവർ വലക്കണ്ണി കീറുന്ന

ഗറില്ലാ മീൻകളെ കാണുന്നില്ല.

അതറിഞ്ഞ് കടൽ കാക്ക

വട്ടമിട്ട് പറക്കുന്നു.

വാക്ക്, നിറം നീരൊഴുക്കായി

ഒരാളെ എഴുന്നേല്പിക്കുമ്പോൾ

കടവിലെ കെട്ടിയിട്ട തോണി

അക്കരെ ചെല്ലാനുള്ള പ്രതീക്ഷ.

അഹങ്കാരം ജലാശയം കുടിച്ചു വറ്റിക്കില്ല

മരത്തിനേറ്റ വേദന

ചില്ലകൾക്കേ അറിയൂ.

നിന്ദകൾ ചേർന്ന ഭാരം

ഒരു വീടും സഹിക്കില്ല.

അവനവൻ ലോകത്തിൽ

അനുകമ്പയില്ല

പാർശ്വങ്ങളിൽ തീയിട്ട്

ഓരോരോ പ്രഹരങ്ങൾ.

സമഭാവനയുടെ മണ്ണേ

തരിക, അവനവൻ വാഴാത്ത നാളുകൾ.