കാർത്തികപ്പള്ളിയിൽ 'അവധി പൂക്കാലം' ബാലവേദി ക്യാമ്പ് സമാപിച്ചു

വടകര: കുട്ടികളിൽ നേതൃത്വപാടവവും സഹജീവിത മനോഭാവവും വളർത്തുക എന്ന ലക്ഷ്യത്തോടെ ബാലവേദി വടകര മണ്ഡലം കമ്മിറ്റി കാർത്തികപ്പള്ളി സ്കൂളിൽ സംഘടിപ്പിച്ച 'അവധി പൂക്കാലം' ദ്വിദിന ക്യാമ്പ് സമാപിച്ചു. സംസ്ഥാന സ്കൂൾ കലോത്സവ വിജയി ഉത്തര മനോജ് ക്യാമ്പ് ഉദ്ഘാടനം ചെയ്തു. പ്രോഗ്രാം കമ്മിറ്റി ചെയർമാൻ ഉസ്മാൻ പിണങ്ങോട്ട് അധ്യക്ഷത വഹിച്ച ചടങ്ങിൽ കൺവീനർ കെ.വി. ജയ്‌ദീപ് സ്വാഗതം ആശംസിച്ചു.

പ്രധാന സെഷനുകൾ:

കുട്ടികളുടെ സർഗ്ഗാത്മകത ഉണർത്തുന്ന വൈവിധ്യമാർന്ന ക്ലാസ്സുകളാണ് ക്യാമ്പിലുടനീളം നടന്നത്:

അറിയാം അടുക്കാം: എം.കെ. ഷിബിൻ (ക്രിയേറ്റീവ് ഡ്രാമ ഫെസിലിറ്റേറ്റർ) നേതൃത്വം നൽകി.

ചിത്രവും ശിൽപവും: രമേശ് രഞ്ജനം, പവിത്രൻ ഒതയോത്ത് എന്നിവർ ചേർന്ന് നയിച്ചു.

ടീച്ചറും കുട്ട്യോളും: വിക്ടേഴ്സ് ചാനൽ ഫെയിം എസ്. സന്ധ്യ ടീച്ചർ കുട്ടികളുമായി സംവദിച്ചു.

നാടൻ പാട്ടും നറുമൊഴിയും: നാടൻപാട്ട് കലാകാരൻ സജീവൻ ചെമ്മരത്തൂർ ക്ലാസ്സെടുത്തു.

കെ.പി.എ.സി നടൻ ഷിനിൽ വടകരയുടെ നേതൃത്വത്തിൽ നടന്ന അഭിനയ പരിശീലനം കുട്ടികൾക്ക് പുതിയൊരു അനുഭവമായി.

ലിനീഷ് മണിയൂർ നയിച്ച സെഷൻ കുട്ടികൾക്ക് ഇംഗ്ലീഷ് ഭാഷാ കൈകാര്യം ചെയ്യുന്നതിൽ വലിയ ആത്മവിശ്വാസം നൽകി.

സനീഷ് വടകര അവതരിപ്പിച്ച വിസ്മയ പ്രകടനം കുട്ടികൾക്ക് കൗതുകമായി.

ക്യാമ്പിന്റെ ഒന്നാം ദിവസം രാത്രി നടന്ന ക്യാമ്പ് ഫയർ ആഘോഷങ്ങൾക്ക് മാറ്റ് കൂട്ടി.