വിഷുഫലം : ഷർമ്മിള പനോളി

വിഷുഫലം

: ഷർമ്മിള പനോളി

​

മീനച്ചൂടിൽ നാടാകെ—

ക്കൊന്നപ്പൂക്കൾ വിരിഞ്ഞുനിൽപ്പൂ,

കണ്ടമ്മതൻ മനം തുടിച്ചു-

ള്ളിൽ സ്വർണ്ണവർണ്ണം പെയ്തിറങ്ങി.

​മിഴിയിൽ തെളിഞ്ഞുപ്പൂത്തിരികൾ,

കൈനീട്ടം നൽകാൻ നാണയച്ചെപ്പ്,

കോടിപ്പുതപ്പുകൾ അടുക്കിവെച്ചു-

മക്കളെയോർത്തു കാത്തിരിപ്പൂ.

​മാവിൻ കൊമ്പിൽ വിഷുപ്പക്ഷി—

പ്പാടിത്തുടങ്ങി പാട്ടൊന്ന്,

മേടസംക്രമ പുലരിയിൽ

കണ്ണനു മുന്നിൽ കണിയൊരുങ്ങി.

​നാലുകൂട്ടം പായസം വെച്ചു,

നാലില മുറിച്ചു സദ്യയുണ്ടു,

ഓലനും കാളനും അവിയലും—

കൂട്ടി മക്കൾ മടങ്ങിപ്പോയി.

​ആഘോഷത്തോടെ മേടം മാഞ്ഞു,

പിന്നെയിടവപ്പാതിതൻ ഇടിമിന്നൽ,

മിഥുനമഴയും കഴിഞ്ഞ്—

കാക്കകരയാത്ത കർക്കിടകം.

​ആയമ്മയിന്നും തനിച്ചാണ്...

വാതിലിൽ മിഴിനട്ടു കാത്തിരിപ്പൂ,

ഇനിവരുന്നൊരു പൊന്നിൻ ചിങ്ങം—

സന്തോഷമേകുമെന്നോർത്തുമാത്രം