കരിക്കകത്തമ്മ പുരസ്‌കാരം ശ്രീകുമാരൻ തമ്പിക്ക്:

തിരുവനന്തപുരം: പ്രശസ്തവും അതിപുരാതനവുമായ കരിക്കകം ശ്രീ ചാമുണ്ഡി ക്ഷേത്രത്തിലെ ഈ വർഷത്തെ ഉത്സവമഹാമഹം മാർച്ച് 24 മുതൽ 30 വരെ നടക്കും. ഉത്സവത്തിന്റെ ഏഴാം ദിനമായ മാർച്ച് 30-നാണ് പ്രസിദ്ധമായ കരിക്കകം പൊങ്കാല. വിശിഷ്ടമായ പൂജകൾ, അന്നദാന സദ്യ, പുറത്തെഴുന്നള്ളത്ത്, കലാപരിപാടികൾ എന്നിവയോടെ ഭക്തിനിർ ഭരമായാകും ചടങ്ങുകൾ നടക്കുകയെന്ന് ക്ഷേത്ര ട്രസ്റ്റ് ഭാരവാഹികൾ പത്രസമ്മേളനത്തിൽ അറിയിച്ചു.

 മാർച്ച് 24-ന് വൈകുന്നേരം 5 മണിക്ക് ഗുരുമന്ദിരത്തിൽ നടക്കുന്ന ഗുരുപൂജയോടെ ഉത്സവ ചടങ്ങുകൾക്ക് തുടക്കമാകും. എല്ലാ ദിവസവും പന്തീരടിപൂജ, നവകം, കലശാഭിഷേകം, ഭഗവതിസേവ എന്നിവ ഉണ്ടായിരിക്കും. മാർച്ച് 28, 29 തീയതികളിൽ രാവിലെ 8.40 മുതൽ ദേവി തങ്കരഥത്തിൽ പുറത്തെഴുന്നള്ളും. തെക്കൻ കേരളത്തിൽ അപൂർവ്വമായി മാത്രം കാണുന്ന ഈ രഥഘോഷയാത്രയിൽ വ്രതമെടുത്ത ഭക്തന്മാരാണ് തേര് വലിക്കുന്നത്.

കലാ-സാംസ്‌കാരിക രംഗത്തെ സമഗ്ര സംഭാവനകൾക്കായി നൽകുന്ന 'കരിക്കകത്തമ്മ പുരസ്‌കാരം 2026' പ്രശസ്ത ഗാനരചയിതാവും സംവിധായകനുമായ ശ്രീകുമാരൻ തമ്പിക്ക് സമർപ്പിക്കും. ഒന്നാം ഉത്സവ ദിനമായ മാർച്ച് 24-ന് വൈകുന്നേരം 6 മണിക്ക് നടക്കുന്ന സാംസ്‌കാരിക സമ്മേളനം കേരള ഗവർണർ ഉദ്ഘാടനം ചെയ്യും. ചടങ്ങിൽ കടകംപള്ളി സുരേന്ദ്രൻ എം.എൽ.എ അധ്യക്ഷത വഹിക്കും. ചലച്ചിത്ര താരം ഭാവന കലാപരിപാടികളുടെ ഉദ്ഘാടനം നിർവ്വഹിക്കും. തിരുവനന്തപുരം മേയർ അഡ്വ. വി.വി. രാജേഷ് ഉൾപ്പെടെയുള്ള പ്രമുഖർ ചടങ്ങിൽ സംബന്ധിക്കും.

 ഉത്സവത്തോടനുബന്ധിച്ച് എല്ലാ ദിവസവും രാത്രിയിൽ പ്രമുഖ കലാകാരന്മാർ അണിനിരക്കുന്ന വിവിധ പരിപാടികൾ അരങ്ങേറും. ഹരിശങ്കർ നയിക്കുന്ന മ്യൂസിക് ബാൻഡ്, ഔസേപ്പച്ചനും സംഘവും അവതരിപ്പിക്കുന്ന 'കാതോടു കാതോരം' ഗാനമേള, പ്രസീത ചാലക്കുടിയുടെ ഫോക് ഷോ, മെഗാ ഷോകൾ തുടങ്ങിയവ പ്രധാന ആകർഷണങ്ങളാണ്. മാർച്ച് 26-ന് നടക്കുന്ന പഞ്ചാരിമേളത്തിൽ ചൊവ്വല്ലൂർ മോഹന വാര്യരുടെ നേതൃത്വത്തിൽ അമ്പതിലധികം വാദ്യപ്രമാണിമാർ പങ്കെടുക്കും.

 മീനമാസത്തിലെ മകം നാളായ മാർച്ച് 30-നാണ് പൊങ്കാല. രാവിലെ 10.15-ന് തന്ത്രി പുലിയന്നൂർ മന നാരായണൻ അനുജൻ നമ്പൂതിരിപ്പാട് പണ്ടാര അടുപ്പിൽ തീ പകരുന്നതോടെ ചടങ്ങുകൾ ആരംഭിക്കും. ഉച്ചയ്ക്ക് 2.15-ന് തർപ്പണത്തോടെ പൊങ്കാല സമാപിക്കും.

 ഇത്തവണ അന്നദാനസദ്യ അഞ്ചു ദിവസത്തിന് പകരം ആറു ദിവസമായി വർദ്ധിപ്പിച്ചിട്ടുണ്ട്. മാർച്ച് 24 മുതൽ 29 വരെ പുതിയ അന്നദാന മണ്ഡപത്തിൽ പ്രതിദിനം ഇരുപതിനായിരത്തോളം പേർക്ക് സദ്യ നൽകും. മാർച്ച് 24-ന് ഡി.ജി.പി റവാഡ ചന്ദ്രശേഖർ അന്നദാനത്തിന്റെ ഉദ്ഘാടനം നിർവ്വഹിക്കും. 18 ഇനം കറികളോട് കൂടിയ വിപുലമായ സദ്യയാണ് ഭക്തർക്കായി ഒരുക്കുന്നത്. പത്രസമ്മേളനത്തിൽ ട്രസ്റ്റ് ചെയർമാൻ എം. രാധാകൃഷ്ണൻ നായർ, പ്രസിഡന്റ് കെ. പ്രതാപചന്ദ്രൻ, സെക്രട്ടറി വി. അശോക് കുമാർ തുടങ്ങിയവർ പങ്കെടുത്തു.

കൂടുതൽ വിവരങ്ങൾക്കായി ക്ഷേത്ര ഓഫീസുമായോ (0471 2507671) വെബ്‌സൈറ്റുമായോ ബന്ധപ്പെടാവുന്നതാണ്.