മടപ്പള്ളിയുടെ അക്ഷരമുറ്റത്തുനിന്ന് ഒരു 'കഥാവീട്'; 21 കഥാകാരന്മാരുടെ സംഗമം നാളെ

'കഥാവീട്, പി.ഒ മടപ്പള്ളി കോളേജ്'

വടകര: കടത്തനാടിന്റെ മണ്ണിൽ വിജ്ഞാനത്തിന്റെയും വിപ്ലവത്തിന്റെയും വിത്തുപാകിയ മടപ്പള്ളി കോളേജ്, മലയാള സാഹിത്യത്തിന് ഒരു പുതിയ അക്ഷരമുറ്റം കൂടി സമ്മാനിക്കുന്നു. കലാലയത്തിന്റെ പ്രൗഢിയും ഗ്രാമീണ വിശുദ്ധിയും ആവാഹിച്ച

21 കഥാകാരന്മാരുടെ സർഗ്ഗസൃഷ്ടികൾ കോർത്തിണക്കിയ 'കഥാവീട്, പി.ഒ മടപ്പള്ളി കോളേജ്' എന്ന പുസ്തകം നാളെ വായനക്കാരിലേക്ക് എത്തുന്നു.

മനുഷ്യഹൃദയത്തിന്റെ നിശ്ശബ്ദ ഭാഷയെ കേൾക്കാനും അവയെ വാക്കുകളാക്കാനും കഴിയുന്ന ഇന്ദ്രജാലമാണ് ഈ പുസ്തകമെന്ന് ഇതിന്റെ ബ്ലർബ് സാക്ഷ്യപ്പെടുത്തുന്നു. ഒരു കലാലയം എന്ന ഒരൊറ്റ നിലപാടുതറയിൽ നിന്നാണ് ഈ കഥാകൃത്തുകളെല്ലാം ജീവിതമെന്ന മഹാസമസ്യയെ നിർദ്ധാരണം ചെയ്യാൻ ശ്രമിക്കുന്നത് എന്നതാണ് ഈ സമാഹാരത്തിന്റെ പ്രത്യേകത.

കഥാവീട്ടിലെ എഴുത്തുകാർ:

മലയാളത്തിന്റെ പ്രിയപ്പെട്ട എഴുത്തുകാരായ ഇ.വി. ശ്രീധരൻ, അക്ബർ കക്കട്ടിൽ, എം. സുധാകരൻ, കെ.എ. മനാഫ്, സി.എച്ച്. ജയചന്ദ്രൻ, ഭാസ്കരൻ വി., ഹരിദാസ് നീലഞ്ചേരി, മേപ്പയിൽ നാരായണൻ, ശശിധരൻ ശ്രീപുരം, സൂര്യ ഗോപൻ, മോഹൻദാസ് മൊകേരി, യു.കെ. രജനി, രാജൻ ചെറുവാട്ട്, പി. ബാബുരാജ്, എം. ജയാനന്ദൻ, എം.പി. ശശിധരൻ, വി.ആർ. സുധീഷ്, ദിനേശൻ കരിപ്പള്ളി, എ.പി. ശശിധരൻ, രാജേന്ദ്രൻ എടത്തുംകര, ഡോ. എം. മുരളീധരൻ എന്നിവരാണ് ഈ സമാഹാരത്തിലെ കഥാകാരന്മാർ.

നൗറ ബുക്സ് പ്രസിദ്ധീകരിക്കുന്ന ഈ പുസ്തകത്തിന്റെ ചീഫ് എഡിറ്റർ ഡോ. എം. മുരളീധരനാണ്. ഇന്ദുമേനോൻ അവതാരികയും സിതാര എസ്. പഠനവും നിർവ്വഹിച്ചിരിക്കുന്നു. മദനന്റെ വരയിൽ വിരിഞ്ഞ കവർചിത്രം പുസ്തകത്തിന് മിഴിവേകുന്നു.

മാർച്ച് 21-ന് വൈകുന്നേരം 4 മണിക്ക് വടകര ടൗൺ ഹാളിൽ വെച്ച് നടക്കുന്ന ചടങ്ങിൽ മലയാളത്തിന്റെ പ്രിയ കഥാകാരൻ എം. മുകുന്ദൻ പ്രകാശന കർമ്മം ഉദ്ഘാടനം ചെയ്യും.

വയലാർ അവാർഡ് ജേതാവ് ഇ. സന്തോഷ് കുമാർ, മുനിസിപ്പൽ ചെയർമാൻ പി.കെ. ശശിക്ക് പുസ്തകം നൽകി പ്രകാശനം നിർവ്വഹിക്കും. മടപ്പള്ളിയുടെ സാംസ്കാരിക പൈതൃകം വരുംതലമുറയ്ക്കായി കരുതിവെക്കുന്ന ഈ ചടങ്ങിന് രാജൻ തയ്യുള്ളതിൽ, കെ.പി. സുനിൽകുമാർ എന്നിവരടങ്ങുന്ന സമിതി നേതൃത്വം നൽകും