അറിവിൻ്റെയും അക്ഷരത്തിന്റെയും നൃത്തവേദികളിൽ വിസ്മയമായി പ്രൊഫ. ബി. വത്സലകുമാരി; ബി.എസ്.എസ്. ദേശീയ പുരസ്‌കാരം സമ്മാനിച്ചു

അക്ഷരലോകത്തെ സപര്യ

എറണാകുളം മഹാരാജാസ് കോളേജിൽ നിന്ന് ഇംഗ്ലീഷ് സാഹിത്യത്തിൽ ബിരുദാനന്തര ബിരുദം നേടിയ വത്സലകുമാരി, ആലുവ യു.സി. കോളേജിലെ ഇംഗ്ലീഷ് വിഭാഗം അധ്യാപികയായി സേവനമനുഷ്ഠിച്ചിട്ടുണ്ട്. വിജ്ഞാനവും ആത്മീയതയും കോർത്തിണക്കി അവർ രചിച്ച 'വിസ്മയം', 'വേദാന്തകഥകൾ', 'സഹജ' എന്നീ പുസ്തകങ്ങൾ ഏറെ ശ്രദ്ധിക്കപ്പെട്ടവയാണ്. കൂടാതെ, മലയാള കവിതകളുടെ സമാഹാരമായ 'തൊട്ടാവാടി പൂക്കൾ' (മൂന്നാം പതിപ്പ്) അവരുടെ കവിതാപാടവത്തിന് തെളിവാണ്.

വിവർത്തന രംഗത്തെ മികവ്

ലോകസാഹിത്യത്തിലെ ക്ലാസിക്കുകളെ മലയാളികൾക്ക് പരിചയപ്പെടുത്തുന്നതിൽ അവർ വഹിച്ച പങ്ക് വലുതാണ്.

ഗ്രഹാം ഗ്രീനിന്റെ പ്രശസ്ത നോവലായ 'പവർ ആൻഡ് ഗ്ലോറി' മലയാളത്തിലേക്ക് പരിഭാഷപ്പെടുത്തി.

രവീന്ദ്രനാഥ ടാഗോറിന്റെ കഥകൾ, കബീർ ദാസിന്റെ കവിതകൾ എന്നിവയ്ക്ക് പുറമെ വിർജീനിയ വുൾഫിന്റെ 'ദി ലൈറ്റ് ഹൗസ് ആൻഡ് മിസിസ് ഡാലോവേ', ലൂയിസ മെയ് ആൽകോട്ടിന്റെ 'ലിറ്റിൽ വിമൻ', സത്യജിത് റേയുടെ 'അഡ്വഞ്ചേഴ്സ് ഓഫ് ഫെലൂഡ', പോൾ സ്കോട്ടിന്റെ 'ജുവൽ ഇൻ ദി ക്രൗൺ' എന്നിവയും അവർ മലയാളത്തിലേക്ക് മൊഴിമാറ്റം നടത്തി.

.

കലയും കരുണയും

സാഹിത്യത്തിനൊപ്പം തന്നെ നൃത്തത്തിലും അവർ തന്റെ വ്യക്തിമുദ്ര പതിപ്പിച്ചു. സംസ്ഥാന തലത്തിൽ നൃത്തത്തിന് സ്വർണ്ണമെഡൽ കരസ്ഥമാക്കിയ വത്സലകുമാരി ഒരു മികച്ച നർത്തകി കൂടിയാണ്. അറിവും കലയും പകർന്നു നൽകുന്നതിനോടൊപ്പം സാമൂഹിക സേവന രംഗത്തും അവർ മാതൃകയാകുന്നു. കോട്ടയം ലക്ഷ്മി നാരായണ ട്രസ്റ്റ് ഉൾപ്പെടെയുള്ള നിരവധി സ്ഥാപനങ്ങളെ സാമ്പത്തികമായി സഹായിക്കുന്നതിനൊപ്പം, ചാമപ്പറമ്പ് ഗവ. എൽ.പി. സ്കൂളിന് ലാപ്ടോപ്പ് കമ്പ്യൂട്ടറുകൾ സംഭാവന നൽകുന്നതടക്കമുള്ള ജീവകാരുണ്യ പ്രവർത്തനങ്ങളിൽ അവർ സജീവമാണ്.

അറിവിന്റെയും ആവിഷ്കാരത്തിന്റെയും വ്യത്യസ്ത തലങ്ങളിൽ പുലർത്തുന്ന ഈ ഔന്നത്യത്തിനുള്ള ഉചിതമായ അംഗീകാരമായാണ് ബി.എസ്.എസ്. ദേശീയ പുരസ്‌കാരം അവർക്ക് സമ്മാനിക്കപ്പെതെന്ന്  ഡോ .കെ കെ എൻ കുറുപ്പ് ചടങ്ങിൽ വ്യക്തമാക്കി .