ദക്ഷിണേന്ത്യൻ ഇൻ്റർ കൊളീജിയറ്റ് വനിതാ ബാസ്കറ്റ്ബോൾ ടൂർണമെൻ്റ് തുടങ്ങി

ആദ്യ ജയം ചാലക്കുടി എസ്എച്ചിനും കോഴിക്കോട് പ്രോവിഡൻസിനും

ചാലക്കുടി : ദക്ഷിണേന്ത്യൻ ഇൻ്റർ കൊളീജിയറ്റ് വനിതാ ബാസ്കറ്റ്ബോൾ ടൂർണമെൻ്റ് എസ്എച്ച് കോളേജിൽ തുടങ്ങി. ആദ്യ മത്സരത്തിൽ ചാലക്കുടി എസ്‌എച്ച് കോളേജ് അങ്കമാലി മോർണിങ് സ്റ്റാർ കോളേജിനെ പരാജയപ്പെടുത്തി (61-22). എസ്.എച്ച് കോളേജിലെ അലീനാ ജെയ്സൺ കളിയിലെ താരമായി. രണ്ടാം മത്സരത്തിൽ കോഴിക്കോട് പ്രോവിഡൻസ് കോളേജ്, കളമശ്ശേരി രാജഗിരി കോളേജിനെ (52-17) പരാജയപ്പെടുത്തി, പ്രോവിഡൻസ് കോളേജിലെ എ.ബി. വർഷ കളിയിലെ താരമായി.

ഗ്രൂപ്പ് മത്സരങ്ങളിൽ ആദ്യ നാലു സ്ഥാനങ്ങളിലെത്തുന്ന ടീമുകൾ 24-ന് നടക്കുന്ന സെമിഫൈനലിലെത്തും. 24-നാണ് ഫൈനലും. ടൂർണമെൻ്റ് നഗരസഭാ ചെയർപേഴ്‌സൺ ആലീസ് ഷിബു ഉദ്ഘാടനംചെയ്‌തു. പ്രിൻസിപ്പൽ പ്രൊഫ. ഡോ സിസ്റ്റർ ഐറിൻ അധ്യക്ഷയായി.

മുനിസിപ്പൽ വൈസ് ചെയർമാൻ കെ.വി. പോൾ, കൗൺസിലർ ബിന്ദു ശശികുമാർ, ഫെഡറൽ ബാങ്ക് സോണൽ മാനേജർ സി.എം. ശശിധരൻ, പോലീസ് എസ്എച്ച്ഒ എം.കെ. സജീവ്, കേരള ബാസ്‌കറ്റ്‌ബോൾ അസോസിയേഷൻ പ്രസിഡന്റ് പി.ജെ. സണ്ണി, മുൻ ഇന്ത്യൻ ബാസ്ക്‌കറ്റ്ബോൾ താരവും പരിശീലകയുമായ അന്നമ്മാ ടൈറ്റസ്, കോളേജ് യൂണിയൻ ചെയർപേഴ്‌സൺ സ്റ്റിയാ ഡിസിൽവ, കായികവിഭാഗം മേധാവി ഡോ. ജെസ്‌മി ജോസ് എന്നിവർ പ്രസംഗിച്ചു.