ദേശീയ സിവിൽ സർവീസ് ബാഡ്‌മിന്റൺ ചാമ്പ്യൻഷിപ്പ് ഏഴംഗ ടീമിൽ നാലും വയനാട്ടിൽനിന്നുള്ളവർ

കല്പറ്റ: ബാഡ്മ‌ിന്റൺ കോർട്ടിൽ വയനാടൻ കരുത്ത്. ദേശിയ സിവിൽ സർവീസ് ബാഡ്‌മിൻ്റൺ ചാമ്പ്യൻഷിപ്പിനുള്ള കേരള ടീമിനെ പ്രഖ്യാപിച്ചപ്പോൾ വയനാടിന് വൻ നേട്ടം. ഓപ്പൺ കാറ്റഗറിയിൽ തിരഞ്ഞെടുക്കപ്പെട്ട ഏഴംഗ ടീമിലെ നാലുപേരും വയനാട് ജില്ലയിൽനിന്നുള്ളവരാണ്. തൃശ്ശൂരിൽനടന്ന സംസ്ഥാന സിവിൽ സർവീസ് ബാഡ്‌മിൻ്റൺ ടൂർണമെന്റിലെ പ്രകടനമാണ് ഉദ്യോഗസ്ഥരെ ദേശീയ ടീമിലെത്തിച്ചത്.

കല്പറ്റ നഗരസഭാ ഓഫീസിലെ എം.സി. ലഷീൻ അഹമ്മദ്. നിബു ജോയ്, കോട്ടത്തറ ഗ്രാമപ്പഞ്ചായത്ത് ഓഫീസിലെ എസ്. സന്തോഷ്, ജില്ലാ വിദ്യാഭ്യാസ ഓഫീസിലെ വി. മിഥുൻ എന്നിവരാണ് ടീമിലിടം നേടിയവർ. ഫെബ്രുവരി 15 മുതൽ 20 വരെ ഗോവയിൽ നടക്കുന്ന ദേശീയ ചാമ്പ്യൻഷിപ്പിൽ ഇവർ കേരളത്തിനായി അണിനിരക്കും. ഈ കായികതാരങ്ങൾ മുൻപും ഒട്ടേറെ ടൂർണമെൻ്റുകളിൽ മികവ് തെളിയിച്ചിട്ടുണ്ട്.