മനം കവർന്ന് 'ഇക്ഷ'

കോഴിക്കോട് : ഓരോരുത്തരും അവരുടെ ചിന്തകളെയും ഭാവനകളെയും പലതരത്തിൽ, പല മാധ്യമത്തിൽ വരച്ചുവെച്ചു. അതെല്ലാം ചേർന്ന് കാണികൾക്ക് ഒരുക്കുന്നത് ഒരു ദൃശ്യപ്രപഞ്ചവും. കേരള ലളിതകലാ അക്കാദമി ആർട്ട് ഗാലറിയിൽ തിങ്കളാഴ്‌ച തുടങ്ങിയ പെയിന്റിങ്ങുകളുടെ ഗ്രൂപ്പ് എക്സിബിഷൻ 'ഇക്ഷ'യാണ് ആസ്വാദകമനം കവരുന്നത്.

അബ്സ്ട്രാക്ട്, ക്രിയേറ്റീവ്, റിയലിസ്റ്റിക്, സർറിയലിസ്റ്റിക്, മ്യൂറൽ വിഭാഗങ്ങളിലെല്ലാമുള്ള പെയിന്റിങ്ങുകളുണ്ട്. മ്യൂറൽ, മധുബനി, രാജസ്ഥാനി ഫോക് ആർട്ട്, ബനാന ലീഫ് പെയിന്റിങ്ങുകളെല്ലാം ശ്രദ്ധനേടുന്നവയാണ്. വേദിക് മെറ്റൽ ആർട്ടിൽ ചെയ്തത ചിത്രങ്ങളും വേറിട്ടുനിന്നു. പല ഭാഗങ്ങളിൽനിന്നുള്ള 80 കലാകാരരുടെ 250 ചിത്രങ്ങളാണ് പ്രദർശനത്തിലുള്ളത്. പ്രദർശനം പോൾ കല്ലാനോട് ഉദ്ഘാടനംചെയ്തു. കെ. ലക്ഷ്‌മണൻ അധ്യക്ഷനായി. ടി. സ്നേഹയാണ് ക്യൂറേറ്റർ.