സർവകലാശാല ക്രിക്കറ്റ്: മാലിക് ദിനാർ കോളേജ് ജേതാക്കൾ

മുന്നാട് : കണ്ണൂർ സർവകലാശാല ഡി-സോൺ ക്രിക്കറ്റ് മത്സരങ്ങളിൽ സീതാംഗോളി മാലിക് ദിനാർ കോളേജ് ഓഫ് ഗ്രാജ്യേറ്റ് സ്റ്റഡീസ് ജേതാക്കളായി. ഫൈനലിൽ കാസർകോട് ഗവ. കോളേജിനെ 17 റൺസിനാണ് പരാജയപ്പെടുത്തിയത്. ആദ്യം ബാറ്റ് ചെയ്‌ത മാലിക് ദിനാർ നാല് വിക്കറ്റിന് 103 റൺസ് നേടിയപ്പോൾ ഗവ. കോളേജ് ആറ് വിക്കറ്റ് നഷ്ടത്തിൽ 86 റൺസാണ് നേടിയത്. അർബാസ് പ്ലെയർ ഓഫ് ദ ടൂർണമെൻ്റ് പുരസ്‌കാരവും നിയാസ് ഫൈനലിലെ മാൻ ഓഫ് ദ മാച്ച് പുരസ്‌കാരവും നേടി.

മുന്നാട് പീപ്പിൾസ് കോഓപ്പറേറ്റീവ് ആർട്സ് ആൻഡ് സയൻസ് കോളേജായിരുന്നു സംഘാടകർ, വ്യാഴം, വെള്ളി ദിവസങ്ങളിൽ നടന്ന മത്സരങ്ങളിൽ 14 ടീമുകൾ പങ്കെടുത്തു. സമാപന സമ്മേളനത്തിൽ സർവകലാശാല സിൻഡിക്കേറ്റംഗം ഡോ. എ. അശോകൻ ട്രോഫി നൽകി. ഓർഗനൈസിങ് സെക്രട്ടറി കെ.വി. സജിത്ത് അതിയാമ്പൂർ അധ്യക്ഷനായി. കെ.വി. ജിതിൻകുമാർ, ശതാബ് ഖാൻ, ടി.വി. അജയകുമാർ, എം.ടി. ബിജുമോൻ എന്നിവർ സംസാരിച്ചു.