കോമൺവെൽത്ത് ഗെയിംസ് ഇന്ത്യയിൽ; പ്രഖ്യാപനം ഇന്നുണ്ടായേക്കും

ന്യൂഡൽഹി: 2030-ലെ കോമൺവെൽത്ത് ഗെയിംസിന് വേദിയായി ഇന്ത്യയിലെ അഹമ്മദാബാദ് നഗരത്തെ ബുധനാഴ്‌ച പ്രഖ്യാപിച്ചേക്കും. ‌സ്കോട്ല‌ൻഡിലെ ഗ്ലാസ്കോയിൽ ബുധനാഴ്‌ച കോമൺവെൽത്ത് സ്പോർട് ജനറൽ അസംബ്ലി നടക്കുന്നുണ്ട്. ഈ യോഗത്തിനുശേഷം വൈകീട്ട് (പഖ്യാപനമുണ്ടാകുമെന്ന് ദേശീയ വാർത്താ ഏജൻസി റിപ്പോർട്ടുചെയ്‌തു. 2030-ലെ വേദിക്കുവേണ്ടി ശ്രമിക്കുന്ന മറ്റൊരു രാജ്യം നൈജീരിയയാണ്. നൈജീരിയക്ക് 2034-ലെ വേദി അനുവദിക്കാമെന്ന ധാരണയിൽ അടുത്തമത്സരം ഇന്ത്യക്ക് അനുവദിക്കാൻ ധാരണയായെന്നാണ് റിപ്പോർട്ട്.

2010-ൽ ഡൽഹി നഗരം കോമൺവെൽത്ത് ഗെയിംസിന് വേദിയായിരുന്നു. 2026-ൽ ഗ്ലാസ്ഗോയിൽ ഗെയിംസ് നടക്കുന്നുണ്ട്. 24-ാമത് എഡിഷനാണ് 2030-ൽ നടക്കുക. 2036-ൽ അഹമ്മദാബാദ് കേന്ദ്രമാക്കി ഒളിമ്പിക്സ് ആതിഥേയത്വത്തിന് ഇന്ത്യ ശ്രമിക്കുന്നുണ്ട്. അതിന്റെ ഒരുക്കം എന്നനിലയിൽക്കൂടിയാണ് കോമൺവെൽത്ത് ഗെയിംസ് നടത്തിപ്പിനെ കാണുന്നത്.