വീൽച്ചെയറിലിരുന്ന് ഒരു ക്രിക്കറ്റ് പോരാട്ടം

തോപ്പുംപടി : ശനിയാഴ്‌ച തോപ്പുംപടി രാജീവ് ഗാന്ധി സ്റ്റേഡിയത്തിൽ നടന്നത് അധികമാരും കാണാത്ത ക്രിക്കറ്റ് പോരാട്ടമായിരുന്നു. കളിക്കാരെല്ലാം വീൽച്ചെയറിൽ. മൈതാനത്തിന് നടുവിലായി ക്രമീകരിച്ച പ്രത്യേക മാറ്റിൽ വീൽച്ചെയറുകളിലിരുന്ന് അവർ ബാറ്റ് ചെയ്‌തു. ബാറ്റിങ്ങും ബൗളിങ്ങുമൊക്കെ സാധാരണ പോലെതന്നെ. എന്നാൽ അവരുടെ ഓട്ടമെല്ലാം വീൽച്ചെയറിലായിരുന്നു.

കേരളത്തിന്റെ വിവിധ ഭാഗങ്ങളിൽ നിന്നെത്തിയ 24 കളിക്കാരാണ് വീൽച്ചെയറിൽ ശനിയാഴ്ച‌ കളിക്കളത്തിലിറങ്ങിയത്. അവർ രണ്ടുടിമായി തിരിഞ്ഞ് സൗഹൃദമത്സരം നടത്തിയപ്പോൾ നാട്ടുകാർ പ്രോത്സാഹനവുമായെത്തി. ജിതിൻ, സ്വരൂപ് എന്നിവർ ക്യാപ്റ്റന്മാരായി. കൊച്ചിൻ വീൽച്ചെയർ വെൽഫെയർ അസോസിയേഷനാണ് വീൽച്ചെയർ ക്രിക്കറ്റ് സംഘടിപ്പിച്ചത്. തോപ്പുംപടി പോലീസ് ഇൻസ്പെക്‌ടർ എ.എൻ. ഷാജു മത്സരം ഉദ്ഘാടനം ചെയ്‌തു. ചലച്ചിത്ര പിന്നണി ഗായകൻ വിപിൻ സേവ്യറും എത്തിയിരുന്നു. സെബാസ്റ്റ്യൻ ഡാനിയൽ അധ്യക്ഷത വഹിച്ചു. കളിയുടെ സംഘാടകനും ജീവകാരുണ്യ പ്രവർത്തകനുമായ ബെന്നി പുത്തംപുരയ്ക്കൽ, എം.എ. സിയാദ് തുടങ്ങിയവർ സംസാരിച്ചു.