ദേശീയ യോഗ ചാമ്പ്യൻഷിപ്പ്: രേവതി രാജേഷിന് വെങ്കലം

കാഞ്ഞിരപ്പള്ളി: മൈസൂരുവിൽ നടന്ന ദേശീയ സീനിയർ യോഗ ചാമ്പ്യൻഷിപ്പിൽ സെയ്ൻ്റ് ഡൊമിനിക്‌സ് കോളേജ് രണ്ടാംവർഷ കൊമേഴ്സ‌് വിദ്യാർഥി രേവതി രാജേഷ് വെങ്കലമെഡൽ നേടി. കേരളത്തിനാണ് ഓവറോൾ രണ്ടാംസ്ഥാനം. പാലായിൽ നടന്ന സംസ്ഥാന ചാമ്പ്യൻഷിപ്പിൽ വെള്ളിമെഡൽ നേടിയാണ് ദേശീയതലത്തിലെത്തിയത്.

എംജി സർവകലാശാല ഇൻ്റർ കൊളീജിയറ്റ് യോഗ ചാമ്പ്യൻഷിപ്പിലും രേവതിക്കായിരുന്നു ഒന്നാംസ്ഥാനം. അടുത്തമാസം ഭുവനേശ്വറിൽ നടക്കുന്ന അന്തസ്സർവകലാശാല മത്സരത്തിന് യോഗ്യത നേടിയിട്ടുണ്ട്.

എരുമേലി മണിപ്പുഴ ചെമ്പകപ്പാറ കൊച്ചുതുണ്ടിയിൽ രാജേഷ് രാജി ദമ്പതിമാരുടെ മകളാണ്. എട്ടുതവണ സംസ്ഥാനത്തെ പ്രതിനിധാനംചെയ്ത് ദേശീയമത്സരത്തിൽ പങ്കെടുത്തിട്ടുണ്ട്.