എഴുത്തുകാരി രാജലക്ഷ്മിക്ക് ഡോ. കെ.കെ.എൻ. കുറുപ്പിന്റെ ആദരം

എഴുത്തുകാരി രാജലക്ഷ്മിക്ക്

ഡോ. കെ.കെ.എൻ. കുറുപ്പിന്റെ ആദരം

ചോമ്പാല: എഴുത്തുകാരിയും അധ്യാപികയും സാമൂഹിക പ്രവർത്തകയുമായ ശ്രീമതി രാജലക്ഷ്മിയെ ഡോ. കെ.കെ.എൻ. കുറുപ്പ് ആദരിച്ചു. ചോമ്പാല അഴിയൂർ കോവക്കൽ കടവിലെ കുട്ടമത്ത് പൈതൃക കേന്ദ്രത്തിൽ വെച്ച് നടന്ന ചടങ്ങിലാണ് മികച്ച സാഹിത്യ പ്രവർത്തനങ്ങൾ ക്ക് ആദരം നൽകിയത്.

ദിവാകരൻ ചോമ്പാല സ്വാഗതം ആശംസിച്ച ചടങ്ങിൽ അഡ്വ. സന്തോഷ് എ.എം. അധ്യക്ഷത വഹിച്ചു. ചടങ്ങിനോടനുബന്ധിച്ച് ഡോ. കെ.കെ.എൻ. കുറുപ്പ് ശ്രീമതി രാജലക്ഷ്മിയുമായി അഭിമുഖം നടത്തി.

സത്യൻ മാടാക്കര പുസ്തക പരിചയം നടത്തുകയും ജീനാ മേരി സുനിത്ത് മുഖ്യാതിഥിയാവുകയും ചെയ്തു.

വൈവിധ്യമാർന്ന പ്രവർത്തനങ്ങൾ

1986 മുതൽ സാക്ഷരതാ പ്രസ്ഥാനത്തിൽ മാസ്റ്റർ ട്രെയിനറായും ട്രെയിനറായും പ്രവർത്തിച്ച ശ്രീമതി രാജലക്ഷ്മി നിർധനരായ കുട്ടികൾക്ക് ട്യൂഷൻ നൽകി വരുന്നു. ശാസ്ത്ര സാഹിത്യ പരിഷത്തിന്റെ മേഖലാ കമ്മിറ്റി അംഗം, പുരോഗമന കലാ സാഹിത്യ പ്രസ്ഥാനത്തിന്റെ ഭാഗം, തൂണേരി ബ്ലോക്കിന് കീഴിലുള്ള 'സായൂജ്യം വയോജന സഭ'യുടെ വൈസ് പ്രസിഡന്റ്, 'രത്നാങ്കി' കുടുംബശ്രീയുടെ പ്രസിഡന്റ്, നാദാപുരം പാലിയേറ്റീവിന്റെ വൈസ് പ്രസിഡന്റ്, K.S.S.P.U. പെൻഷൻ സംഘടനയുടെ ബ്ലോക്ക് ജോയിന്റ് സെക്രട്ടറി എന്നീ നിലകളിൽ സജീവമാണ്. 'നവനീതം' എന്ന കലാ സംഘടനയുടെ വാട്‌സാപ്പ് കൂട്ടായ്മയ്ക്കും ഇവർ നേതൃത്വം നൽകുന്നുണ്ട്.

സാഹിത്യരംഗത്തെ നേട്ടങ്ങൾ

'കാലിഡോണിയൻ കാക്കകൾ' എന്ന കവിതാ സമാഹാരത്തിന് 'കലാനിധി സിൽവർ ജൂബിലി യൂസഫലി കേച്ചേരി സ്പെഷ്യൽ ജൂറി പുരസ്കാരം' ലഭിച്ചിട്ടുണ്ട്. 'ജനിമൃതികൾക്കിടയിലെ താളപ്പിഴകൾ' എന്ന ചെറുകഥാ സമാഹാരത്തിന് 'കൊച്ചിൻ സാഹിത്യ അക്കാദമി അവാർഡും' ലഭിച്ചു. കൂടാതെ, 150 കവികൾ പങ്കെടുത്ത കവിയരങ്ങിൽ കവിത ചൊല്ലിയതിന് 'ലിംക ബുക്ക് ഓഫ് വേൾഡ് റെക്കോർഡും' സർട്ടിഫിക്കറ്റും കരസ്ഥമാക്കി. ആറ് പുസ്തകങ്ങൾ ഇവർ പ്രസിദ്ധീകരിച്ചിട്ടുണ്ട്. ഇതിൽ മൂന്ന് കവിതാ സമാഹാരങ്ങളും ഒരു ചെറുകഥാ സമാഹാരവും നാടിന്റെ ചരിത്രവും യാത്രാവിവരണവും ഉൾപ്പെടുന്നു. മികച്ച കലാ പ്രവർത്തനത്തിന് KSSPU തൂണേരി ബ്ലോക്കിന്റെ ആദരവും ലഭിച്ചിട്ടുണ്ട്.

ഭർത്താവ്: ടി.പി. ജനാർദ്ദനൻ നമ്പ്യാർ (മുൻ പ്രവാസി). ഇയ്യങ്കോട് ശ്രീധരൻ, ചിണ്ടൻകുട്ടി, കേശവൻ, കൗമുദി എം.പി. എന്നിവർ സഹോദരങ്ങളാണ്. രാജേഷ്. ജെ (ഓസ്‌ട്രേലിയ, മെൽബൺ), രാകേഷ് ജെ. (യു.കെ.) എന്നിവരാണ് മക്കൾ.