സബ് ജൂനിയർ ബാസ്‌കറ്റ് ബോൾ: ആലപ്പുഴയും കോഴിക്കോടും ചാമ്പ്യന്മാർ

പുന്നപ്ര : ജ്യോതിനികേതൻ സീനിയർ സെക്കൻഡറി സ്‌കൂളിൽ നടന്ന അൻപതാമത് സംസ്ഥാന സബ് ജൂനിയർ ബാസ്‌കറ്റ് ബോൾ ചാമ്പ്യൻഷിപ്പിൽ ആൺകുട്ടികളുടെ വിഭാഗത്തിൽ ആതിഥേയരായ ആലപ്പുഴയും പെൺകുട്ടികളുടെ വിഭാഗത്തിൽ കോഴിക്കോടും വിജയികളായി.

എറണാകുളത്തെ (69-18) പരാജയപ്പെടുത്തിയാണ് പെൺകുട്ടികളുടെ വിഭാഗത്തിൽ കോഴിക്കോട് വിജയിച്ചത്. ആൺകുട്ടികളുടെ വിഭാഗത്തിൽ ആലപ്പുഴ (67-48) കോഴിക്കോടിനെ പരാജയപ്പെടുത്തി.

കേരള ബാസ്ക‌റ്റ് ബോൾ അസോസിയേഷൻ്റെ ആഭിമുഖ്യത്തിൽ ആലപ്പുഴ ജില്ലാ ബാസ്കറ്റ് ബോൾ അസോസിയേഷനായിരുന്നു ചാമ്പ്യൻഷിപ്പിൻ്റെ സംഘാടകർ. മൂന്നാംസ്ഥാനത്തിനു വേണ്ടിയുള്ള മത്സരത്തിൽ ആൺകുട്ടികളുടെ വിഭാഗത്തിൽ എറണാകുളം കോട്ടയത്തെയും (53-52), പെൺകുട്ടികളുടെ വിഭാഗത്തിൽ മലപ്പുറം തൃശ്ശൂരിനെയും (38-26) പരാജയപ്പെടുത്തി.

മികച്ച കളിക്കാരായി ആൺകുട്ടികളിൽ ആലപ്പുഴയുടെ റെക്‌സൺ ആൻ്റണിയും പെൺകുട്ടികളിൽ കോഴിക്കോടിൻ്റെ കെ. അക്ഷരയും തിരഞ്ഞെടുക്കപ്പെട്ടു. കൊച്ചി ഗ്ലോബൽ പബ്ലിക് സ്‌കൂൾ ചെയർമാൻ പുരയ്ക്കൽ ജേക്കബ്, എച്ച്. സലാം എംഎൽഎ എന്നിവർ ട്രോഫികൾ നൽകി. കേരള ബാസ്‌കറ്റ് ബോൾ അസോസിയേഷൻ പ്രസിഡൻ്റ് ജേക്കബ് ജോസഫ് അധ്യക്ഷനായി.

ജനറൽ കൺവീനർ റോണി മാത്യു, ഓർഗനൈസിങ് സെക്രട്ടറി ജോൺ ജോർജ്, ജ്യോതിനികേതൻ സ്‌കൂൾ പ്രിൻസിപ്പൽ സെൻ കല്ലുപുര എന്നിവർ പ്രസംഗിച്ചു.