ജില്ലാ ജൂനിയർ അത്ലറ്റിക് മീറ്റ്,മുന്നിൽ അൽഫോൻസാ അക്കാദമി

പാലാ: ജില്ലാ ജൂനിയർ അത്ലറ്റിക് മീറ്റിൽ പാലാ അൽഫോൻസാ അത്ലറ്റിക് അക്കാദമിയുടെ കുതിപ്പോടെ ആദ്യദിനം. കഴിഞ്ഞവർഷത്തെ ജേതാക്കളായ അൽഫോൻസാ മറ്റുടീമുകളെ ബഹുദൂരം പിന്നിലാക്കിയാണ് മുന്നേറ്റം. 321 പോയിന്റാണ് നേടിയത്.

20 സ്വർണവും 17 വെള്ളിയും എട്ട് വെങ്കലവുമാണ് ഇതുവരെ നേടിയത്. ഒൻപത് സ്വർണവും നാല് വെള്ളിയും ഒൻപത് വെങ്കലവും നേടിയ ചങ്ങനാശ്ശേരി അസംപ്ഷൻ കോളേജ് 134 പോയിൻ്റുനേടി രണ്ടാമതാണ്. അഞ്ചു സ്വർണവും ഏഴ് വെള്ളിയും നാല് വെങ്കലവും നേടിയ പൂഞ്ഞാർ എസ്എംവി എച്ച്എസ്എസ് 116.5 പോയിന്റോടെ മൂന്നാമതാണ്.

20,18,16,14 എന്നീ പ്രായപരിധിക്കുള്ളിൽ ആൺ, പെൺ വിഭാഗങ്ങളായാണ് മത്സരം. 20 വയസ്സിന് മുകളിലുള്ള സീനിയർ വിഭാഗങ്ങളെ ഇത്തവണ മത്സരത്തിൽനിന്ന് ഒഴിവാക്കിയിരുന്നു. 20 വയസ്സിൽ താഴെയുള്ള വനിതകളിൽ അൽഫോൻസ അത്ലറ്റിക് അക്കാദമിയും പുരുഷന്മാരിൽ സെയ്ന്റ് ഡൊമിനിക്സ് കോളേജും മുന്നിലാണ്. 18 വയസ്സിൽ താഴെയുള്ളവരിൽ ഇരുവിഭാഗങ്ങളിലും അൽഫോൻസാ അത്ലറ്റിക് അക്കാദമിയാണ് മുന്നിൽ. 15 വയസ്സിൽ താഴെ പെൺകുട്ടികളുടെ വിഭാഗത്തിൽ ഭരണങ്ങാനം എസ്.എച്ച്.ജി.എച്ച്.എസും ആൺകുട്ടികളുടെ വിഭാഗത്തിൽ പൂഞ്ഞാർ എസ്എംവിഎച്ച്എസ് എസും മുന്നിൽ നിൽക്കുന്നു.

14 വയസ്സിൽ താഴെയുള്ളവരിൽ ഇരുവിഭാഗത്തിലും അൽഫോൻസാ അക്കാദമിയാണ് മുന്നിൽ. മീറ്റ് വ്യാഴാഴ്‌ച സമാപിക്കും.