കടത്തനാട് കാവ്യ പെരുമ :സത്യൻ മാടാക്കര .

വർഗ്ഗ വ്യത്യാസം രണ്ടു ചിത്രങ്ങളിലൂടെ അവതരിപ്പിച്ച് നമ്മുടെ അവബോധത്തിൽ കാലഘട്ടത്തിന്റെ അവസ്ഥ പ്രതിഫലിപ്പിക്കുന്ന ഒരു ഭാഗം ഇങ്ങനെ . മറ്റൊന്നും പറയാതെ അജ്ഞാതകവി ഇത് മാത്രമേ പറയുന്നുള്ളു:

തമ്പുരാന്റെ മാളികയിൽ:

ആവണിപ്പലവെച്ചും ദീപം വെച്ചും

ചങ്ങല വട്ടയിൽ തിരിയുമിട്ട്

അമൃതേത്താലത്താഴം കൊള്ളുന്നോറ്

പൂലുവക്കുടിലിൽ:

വരിനെല്ലുരിയരി കഞ്ഞി വെച്ച്

കണ്ണിപ്പരളുമായ്യൊറിക്കൊഞ്ചൻ

വാല ത്താൻമീനും പൊയക്കലെ ഞണ്ടും

കൂട്ടിക്കറിവെച്ച് കഞ്ഞി വെച്ച്

അത്തായം കഞ്ഞി കയിക്കുന്നോള്

 സൗന്ദര്യo മുറ്റി നില്ക്കുന്ന മറ്റൊരു ഭാഗമാണ് പൂമാതൈയുടെ കൊയ്ത്തുപാട്ടു വർണ്ണന. സൗന്ദര്യോപാസന ഇത്ര നിറഞ്ഞു നിൽക്കുന്നതു കൊണ്ടായിരിക്കാം ഈ വരികൾ നമ്മളെ വല്ലാതെ ആകർഷിക്കുന്നത്.

കാറ്റിലെപ്പൂമാലപ്പൂവ് പോലെ

ത്തടിക്കൊയഞ്ഞല്ലോ പാടുന്നോള്

നീട്ടിയും കുറുക്കിയും ചേലൊപ്പിച്ചും

പാട്ട് പൊടിമാനം കൊള്ളിക്കുന്നു.

പുഞ്ചക്കതിരിനും പൂക്കൈതക്കും

പറക്കും പറവക്കും കേൾക്കുന്നോർക്കും

കൊതിതോന്നും പൂലുവ പ്പെണ്ണിനോട്

പുഞ്ചക്കതിരിനു വന്ന തത്ത

പാട്ട് കേട്ട് കൊമ്പത്തൊറങ്ങിപ്പോയി

അന്തിക്കു പട്ടിണിപ്പാടായിറ്റും

കൂരിയാറ്റ കൂട്ടിന്നെറങ്ങിയില്ല

മീൻ കണ്ണൻ പൂവാളി വെള്ളക്കൊച്ച

പരൽ നോക്കി കണ്ടിക്കല് നിന്നും പോയി.

നാടും പച്ചപ്പും ഉണങ്ങുന്ന വേനലിന്റെ വരൾച്ച . ചുട്ടുപഴുത്ത വെയിലിലെ ഭൂമിയുടെ അവസ്ഥ. പ്രകൃതിയും ചരാചരങ്ങളുമൊക്കെ ചൂടിൽ നരകിക്കുന്നു. വടക്കൻ പാട്ടുകാരന്റെ ഭാഷാവിരുത് ഇവിടെയാണ് കൂടുതൽ ശ്രദ്ധിക്കേണ്ടത്.

കുളം വറ്റി കൈതോലക്കോട് വറ്റി

ആറ്റുകര, അത്താണിത്തോട് വറ്റി

നീരറ്റു പുഞ്ച കരിഞ്ഞു പാളി

കുടിനീരിറക്കാനും നീരില്ലാ ലോ

മുറ്റത്തെ മാളി മയങ്ങിപ്പോയി

ചെന്തങ്ങളിനീരും വാടി വീണു

വള്ളിയും വായ ഒണങ്ങിപ്പോയി

നാനായ് കറക്കുംപൈക്കുമ്പച്ചിക്കു

പാലില്ല പുല്ലൊന്നും നാട്ടിലില്ല.

ചുടു ചൂടാറിക്കുന്ന തീവെയിലിലാകെ

എരിപൊരി സഞ്ചാരം പാതിരാക്ക്.

ഒട്ടനവധി നുറുങ്ങു ചിത്രങ്ങളിലൂടെ സുന്ദര ചിത്രമൊരുക്കും തച്ചോളിപ്പാട്ടുകളിൽ ഭൂരിഭാഗവും ദുസ്ഥിതിയിലകപ്പെട്ടു പോയ ചുറ്റുപാടിലാണിന്ന്. ലാളിത്യം, ജീവിത സ്പർശിയായ നാടോടി ശീല് നിറഞ്ഞു നിൽക്കുന്ന പാട്ടുകൾ പരിശോധിച്ചാൽ വൈകാരികസത്തയുടെ തെളിനീരാണ് കിട്ടുക.

നിയതമായൊരു ചട്ടക്കൂടില്ലാത്തത് കൊണ്ടു തന്നെ വടക്കൻ പാട്ടുകൾ അജ്ഞാത ഗ്രാമീണ കവികളെ ഓർമ്മപ്പെടുത്തുന്നു. പതുക്കെപ്പതുക്കെ കരളു രുകി പറയുന്ന കഥകളിലൂടെ വായനക്കാരുടെ മനസ്സിൽ ഇ കെട്ടുന്ന രീതിയാണ് മിക്കവാറും നാടോടിപ്പാട്ടുകളുടെ ഘടന. മനുഷ്യമനസ്സിന്റെ ചക്രവാളത്തിൽ വീശുന്ന തണുത്ത കാറ്റായി, അക്ഷയ പാത്രമായി വടക്കൻ പാട്ടുകൾ മാറുമ്പോൾ പരമ്പര്യ കലയെ അറിഞ്ഞ് സംരക്ഷിക്കേണ്ടത്, ബഹുമാനിക്കേണ്ടത് നമ്മുടെ കടമയാണ്. കർത്തവ്യമാണ്.