ലോക കുടുംബപ്രവേശനകവാടമാണ് വായന - പ്രൊഫ.ടി.എം. യേശുദാസൻ

കുറിച്ചി: ലോക കുടുംബത്തിലേക്കുള്ള പ്രവേശനകവാടമാണ് വായനയെന്ന് എഴുത്തുകാരൻ പ്രൊഫ.ടി.എം. യേശുദാസൻ. കുറിച്ചി കെഎൻഎം പബ്ളിക് ലൈബ്രറി വായനപക്ഷാചരണത്തോടനുബന്ധിച്ച് നടത്തിയ സാഹിത്യ ചർച്ച ഉദ്ഘാടനം ചെയ്യുകയായിരുന്നു അദ്ദേഹം.

വായനയിലൂടെ സമൂഹത്തിലെ നന്മയെയും തിന്മയേയും തിരിച്ചറിയാനാവുമെന്നും വായനയെ ഭയപ്പെടുന്നവർ ഏകാധിപതികളായ ഭരണക്കാർ മാത്രമാണെന്നും അദ്ദേഹം പറഞ്ഞു. ലൈബ്രറി പ്രസിഡൻ്റ് ടി.എസ്. സലിം അധ്യക്ഷനായിരുന്നു. പത്ത് കുട്ടികൾ വായനക്കുറിപ്പിലൂടെ അവരുടെ വായനാനുഭവങ്ങൾ പങ്കുവച്ചു

വായനയുടെ മഹത്വം വിശദമാക്കി കുറിച്ചി എവിഎച്ച്എസ്എസ് പ്രിൻസിപ്പൽ വി. അരുൺ, പ്രഥമാധ്യാപിക എസ്.ടി. ബിന്ദു, എൻ.ഡി. ബാലകൃഷ്‌ണൻ, സുരേന്ദ്രൻ സുരഭി, പി.പി. മോഹനൻ, മിനി തോമസ്, കെ.എൽ. ലളിതമ്മ എന്നിവർ സംസാരിച്ചു.