ഇന്ന് വായനാ ദിനം : ദിവാകരൻ ചോമ്പാല,

ഇന്ന് വായനാ ദിനം

: ദിവാകരൻ ചോമ്പാല

കേരളഗ്രന്ഥശാലാപ്രസ്ഥാനത്തിൻറെ ഉപജ്ഞാതാവും പ്രചാരക പ്രമുഖനുമായ ശ്രീ പി എൻ പണിക്കരുടെ ചരമ ദിനമാണ് ഇന്ന് ജൂൺ 19 ന് .

കേരളജനത 1996 മുതൽ അദ്ദേഹത്തിന്റെ ചരമദിനം വായനാദിനമായി ആചരിക്കുന്നു .

വായനയും കത്തെഴുത്തുമെല്ലാം അന്യമായിക്കൊണ്ടിരിക്കുന്ന ഒരുകാലഘട്ടത്തിലൂടെയാണ് നമ്മൾ ഇന്ന് കടന്നുപോകുന്നത് .

മെസ്സേജുകളും ചാറ്റിങ്ങും വീഡിയോകോളുകളൂം ഓൺലൈൻ തരംഗമായിത്തീർന്ന വർത്തമാനകാലസമൂഹം വായനയിൽ നിന്നും അകലംപാലിച്ചുകൊണ്ടുള്ള ജീവിതക്രമത്തിലൂടെ കടന്നുപ്പോകുന്നുവെന്നുപറഞ്ഞാൽ തെറ്റാവുമോ ?.

കടന്നുപോയ വഴികളിലൂടെ വായനയുടെ ഓർമ്മക്കാഴ്ച്ചകൾ പരതിക്കൊണ്ട് ഏറെ പിന്നോട്ട് പോകുമ്പോൾ എഴുപത്തിയഞ്ചോളം വർഷങ്ങൾക്ക് മുൻപ് വരെ തടസ്സമില്ലാതെ പുറംതിരിഞ്ഞുനോക്കാനാവുന്നുണ്ട് .

കണ്ണാടിച്ചില്ലിട്ട വലിയ അലമാരക്കകത്ത് വസ്ത്രങ്ങൾ അടുക്കിവെച്ച തട്ടുകൾക്ക് മുകളിലായി അച്ഛൻ്റെ ഒരുകൂട്ടം ആയുർവ്വേദഗ്രന്ഥങ്ങൾ .

ശ്രീവരാഹമിഹിരാചാര്യന്‍ വിരചിച്ച ഹോരാശാസ്ത്രം പോലുള്ള പലതും സംസ്‌കൃതത്തിൽ 

കയ്യെഴുത്ത് പ്രതികളും താളിയോലഗ്രന്ഥങ്ങളും പോക്കറ്റുബുക്കുകളായും കുറെയേറെ .കൂട്ടത്തിൽ മഹോപാധ്യായൻ എന്നപേരിൽ ഒരു മലയാളം ഇംഗ്ളീഷ് ഡിക്ഷണറി .

അമരകോശം ,രാമായണം , ഭഗവത്ഗീത ,ഭാഗവതം പോലുള്ള ചിലപുസ്തകങ്ങൾ .

അച്ഛന്റെ സഹോദരി ചാരുകസേരയിൽ കിടന്നു കൊണ്ട് മടിയിൽ കൃഷ്ണഗീത പുസ്തകം തുറന്നുവെച്ച് സന്ധ്യാനേരത്ത് നല്ല ഈണത്തിൽ കൃഷ്‌ണപ്പാട്ട് സാമാന്യം ഉച്ചത്തിൽ വായിക്കുമായിരുന്നു .

അച്ഛന്റെ അച്ഛൻ രാമായണവും വായിക്കുമായിരുന്നു .കുഞ്ഞുപ്രായത്തിൽ ഇതൊക്കെ ഉപ്പോ ഉണ്ണിമാങ്ങയോ എന്നറിയില്ലെങ്കിലും വെറുതെ കേട്ടിരിക്കാൻ ഒരുസുഖം .

ഇതൊക്കെ കേട്ടും കണ്ടുമാണ് ഞാൻ വളർന്നതും മുതിർന്നതും .

മൂന്നാം ക്ലാസ്സിൽ പഠിക്കുന്ന സമയത്ത് എന്റെ അച്ഛൻഎന്നെ അമരകോശം മനഃപ്പാഠമാക്കാൻ ശ്രമിക്കുമായിരുന്നു . 

ഓം ഭുർ ഭൂവസ്വ: എന്ന ഗായത്രിമാത്രം പോലുള്ള ചിലത് മൂന്നാംക്ലാസ്സിൽ പഠിക്കുന്ന സമയത്ത് തന്നെ അച്ഛൻ എന്നെക്കൊണ്ട് കാണാതെ ചൊല്ലിക്കുമായിരുന്നു .

എന്തുകൊണ്ടോ ചെറിയപ്രായത്തിലെ വായന എനിക്കിഷ്ടമായിരുന്നു .നാട്ടുമ്പുറത്ത് പത്രങ്ങൾ വാങ്ങുന്നവർ വിരളം .

ഇടവഴികളിലൂടെ തലയിൽ കെട്ടിയ തോർത്തുമുണ്ടിനു മുകളിൽ മാതൃഭൂമി പത്രക്കെട്ടും വെച്ച് '' മാറൂമി മാറൂമി '' എന്ന് ഉറക്കെ വിളിച്ചുകൊണ്ട് നടക്കുന്ന മാതൃഭൂമി കിട്ടൻ പത്രവുമായെത്തുക ഏകദേശം ഉച്ച 12 മണി .

ഒരണയാണെന്നു തോന്നുന്നു 'അന്നത്തെ പത്രത്തിന്റെ വില .നെയ്ത്തുശാലകളിലും ബീഡിതെറുപ്പു കേന്ദ്രങ്ങളിലും വായന അറിയാവുന്ന ആരെങ്കിലും ഉറക്കെ പത്രം വായിച്ചുകൊടുക്കുന്നത് അന്നത്തെ പതിവ് . പുസ്തകങ്ങൾ പൊതിയിടാനും മാതൃഭൂമിപത്രം .ബ്രൗൺ പേപ്പറുകളൊന്നും അന്ന് മാർക്കറ്റിലില്ല .

വീടിനടുത്ത് റയിലോരത്ത് പട്ടിയാട്ട് ഗേറ്റിനു സമീപം അളവക്കാൻ സ്‌മാരക വായനശാല .

വർഷങ്ങൾക്ക് മുൻപുള്ള എന്റെ ചില ഓർമ്മക്കാഴ്ചകൾ .

നാട്ടിടവഴികളല്ലാതെ പഞ്ചായത്ത് റോഡുകളൊന്നുമില്ലാത്ത കാലം .തട്ടോളിക്കര ,ഏറാമല ,കുന്നുമ്മക്കര ,ഒഞ്ചിയം ,ഓർക്കാട്ടേരി തുടങ്ങിയ ഉൾനാടൻ ഗ്രാമങ്ങളിലുള്ളവർക്കെല്ലാം മുക്കാളി അങ്ങാടിയിലെ ത്തണമെങ്കിൽ കാൽനടയായി പട്ടിയാട്ട് ഗേറ്റിലൂടെ റയിൽ കടന്നുവേണം .

റയിലിന് കിഴക്കുവശം നെഞ്ചിൽ നിറയെ രോമമുള്ള ചന്തമ്മൻ എന്നൊരാളുടെ ചായക്കട .

സാധുവായ ഒരു മനുഷ്യൻ .മുഖ്യസഹായിയായി അദ്ദേഹത്തിൻറെ ഭാര്യ നാണിയമ്മ .

റയലിന് മറുവശവും ഒരുചായക്കടയും ചെറിയ പലചരക്കുകടയും .അനങ്ങാറത്ത് രാഘവൻ എന്നൊരാളായിരുന്നു അവിടെ പലചരക്കുകട നടത്തിയത് .

അനങ്ങാറത്ത് രാഘവൻറെ വീടിനോടുചേർന്ന് വലിയതോതിൽ നെയ്ത്തുശാല .തൊട്ടടുത്തുതന്നെ കാരോക്കിയിൽ കടുങ്ങോൻ മാസ്റ്ററുടെ വീട്ടിലും മോശമല്ലാത്ത തോതിൽ നെയ്ത്തുശാല .നെയ്ത്തുതൊഴിലാളികളായി ഒരുകൂട്ടം ആളുകളും .ഇവരൊക്കെയായിരുന്നു ഈ ചായക്കടകളിലെ പതിവുകാർ .

വായനശാലയിലെ വായനക്കാരിൽ വലിയവിഭാഗവും ഇവരൊക്കെത്തന്നെ .

ഈ വായനശാലയുടെ കെട്ടിടം കാലപ്പഴക്കത്തിൽ വീണടിഞ്ഞെങ്കിലും പുതിയതലമുറയിലെ ചുണക്കുട്ടന്മാരായ പരിസരവാസികളുടെ കൂട്ടായ്‌മയിൽ അളവക്കൻ കൃഷ്ണൻ സ്‌മാരക വായനശാല സ്‌മൃതിമണ്ഡപം പോലെ പുനസൃഷ്ട്ടി നടത്തിയിരിക്കുന്നു .

വായനശാലയിൽ ഇരിക്കാൻ ഒരുബഞ്ച് ,പത്രം വെക്കാൻ മറ്റൊരു ബെഞ്ച് .ചുമരിനോട് ചേർന്ന് മരത്തടിയിൽ പുസ്‌തകങ്ങൾ .

വായനശാലയിൽ കയറാൻ തെങ്ങിൻ കവുക്കോലുകൊണ്ട് നിർമ്മിച്ച ഗോവണി .

പിടിച്ചുകയറാൻ വലിച്ചുകെട്ടിയ ഒരുകയർ .അക്കാലത്തെ കമ്യുണിസ്റ് പാർട്ടിയുടെ സമുന്നതനേതാക്കളിൽ ആരോ ആണ് ഈ വായനശാലയുടെ ഉത്‌ഘാടനം നിർവ്വഹിച്ചത് .

1948 കാലത്ത് ഒഞ്ചിയത്തുനടന്ന് വെടിവെപ്പിൽ മരിച്ചുവീണ തദ്ദേശീയനായ സഖാവ് അളവക്കൻ കൃഷ്ണൻ എന്നകമ്യുണിസ്റ്റുകാരന്റെ ഓർമ്മക്കായാണ് നാട്ടുകാർ ഈ വായനശാലക്ക് അദ്ദേഹത്തിന്റെ പേരിട്ടത് .അദ്ദേഹത്തിന്റെ മകൻ ദാസൻ എന്നോടൊപ്പം ചെറിയക്ലസ്സുകളിൽ പഠിച്ചിരുന്നു .ഈ അടുത്താണ് അദ്ദേഹം മരണപ്പെട്ടത് .

തീവണ്ടിക്കച്ചാലിൽ ആണ്ടി ,അനങ്ങാറത്ത് രാഘവൻ ,കണിയാങ്കുനി കുമാരൻ തുടങ്ങിയ ചിലരൊക്കെയായിരുന്നു അക്കാലത്ത് വായനശാലയുടെ മേൽനോട്ടക്കാർ .

മാസവരിസംഖ്യയായി ഒരണ കൊടുത്താൽ ആർക്കും വായനശാലയിൽ നിന്നും പുസ്തകമെടുക്കാം .

നാട്ടുകാർ സംഭാവനചെയ്ത നിരവധി പുസ്‌തകങ്ങൾക്കൊപ്പം അക്കാലത്തെ പ്രമുഖരായ എഴുത്തുകാരുടെ നോവലുകൾ ചെറുകഥകൾ കവിതകൾ അങ്ങിനെ പലതും ഇവിടെ കിട്ടുമായിരുന്നു .

വായിക്കാൻ നവയുഗം എന്ന മാസിക. മാതൃഭൂമി വാരിക .കലാമാല എന്ന സിനിമാമാസിക.,സോവിയറ്റ് യൂണിയനിൽ നിന്നും പ്രസിദ്ധീകരിച്ചിരുന്ന സോവിയറ്റ് നാട് തുടങ്ങിയ ചില സൗജന്യ പ്രസിദ്ധീകരണങ്ങൾ ഇവയൊക്കെയായിരുന്നു ഇവിടുത്തെ അക്ഷരക്കാഴ്ചകൾ .

ഇവിടെ കിട്ടിയിരുന്ന പുസ്‌തകങ്ങൾ പലതും പ്രഭാത് ബുക്ക് പ്രസിദ്ധീകരിച്ചിരുന്നവ.

കമ്യുണിസം നാട്ടിൽ പച്ചപിടിച്ചുവരുന്ന സമയം .വായനയിലൂടെ അറിവും അറിവിലൂടെ തിരിച്ചറിവും അതിലൂടെ കമ്യുണിസവുമായി ആളുകളെ ബന്ധിപ്പിക്കാനുള്ള ഒരുശ്രമവും കൂടിയായിരിക്കാം അക്കാലങ്ങളിൽ നാട്ടുമ്പുറങ്ങളിൽ പലേടങ്ങളിലും വായനശാലകൾക്ക് തുടക്കമിട്ടത് .

അഞ്ചാം ക്ലാസ്സിലോ ആറിലോ മറ്റോ ആണ് അന്ന് ഞാൻ പഠിച്ചിരുന്നത് .

ഒന്നൊഴിയാതെ ദിവസവും വൈകുന്നേരങ്ങളിൽ വീടിനടുത്തുള്ള വായനശാലയിൽ ചെന്ന് മാസികകൾ മറിച്ചുനോക്കും .

എന്റെ അച്ഛന്റെ അച്ഛൻ വായനശാലയിൽ പോകുന്നതിനെ ഒരിക്കലും തടഞ്ഞിരുന്നില്ല .പ്രോത്സാഹിപ്പിച്ചതേയുള്ളൂ .

ചങ്ങമ്പുഴയുടെ രമണൻ തുടങ്ങി തോപ്പിൽ ഭാസിയുടെ ഒളിവിലെ ഓർമ്മകൾ ,പൊൻകുന്നം വർക്കി, പൊൻകുന്നം ദാമോദരൻ ,തകഴി തുടങ്ങിയവരുടെ ചിലപുസ്തകങ്ങൾ കൂട്ടത്തിൽ മുട്ടത്തുവർക്കിയുടെ നോവലുകൾ ,ഡിറ്റക്ടീവ് നോവലുകൾ .വായനയുടെ തുടക്കം അങ്ങിനെ .

ഡിറ്റക്ടീവ് നോവലുകൾ വായിക്കുന്നതിൽ എന്റെ അച്ഛന്റെ അച്ഛൻ എനിയ്ക്ക് വിലക്കിട്ടതുകൊണ്ടുതന്നെ പഠിക്കുന്ന പുസ്തകങ്ങൾക്കിടയിൽ ചേർത്തുവെച്ചായിരുന്നു ഞാൻ കാണാതെ വായിച്ചുതീർത്തത് .

ഞാൻ വായനശാലയിൽ നിന്നെടുക്കുന്ന പല പുസ്തകങ്ങളും അദ്ധേഹം ചാരുകസേരയിൽ മർലർന്നുകിടന്നു വെറുതെ മറിച്ചുനോക്കുമായിരുന്നു .

വളർച്ചയുടെ കാലഘട്ടങ്ങളിലും കൂടുതലും വായിച്ചിരുന്നത് മുട്ടത്തുവർക്കിയുടെ നോവലുകൾ .പ്രണയത്തിന്റെ മധുരക്കാഴ്ചകൾക്കൊപ്പം പ്രേമനൈരാശ്യത്തിൻറെയും മാനസികസംഘർഷങ്ങളുടെയും നേർക്കാഴ്ച്ചകളായിരുന്നു പലനോവലുകളുടെയും ഇതിവൃത്തം .

മലയാള അക്ഷരക്കൂട്ടുകളോടുള്ള പ്രണയം തുടങ്ങിയതുമങ്ങിനെ.

വടക്കേ മലബാറുകാരനായിരുന്നിട്ടും തെക്കൻകേരളത്തിലെ ചില നാട്ടുഭാഷകൾ മനസ്സിൽ കടന്നുകൂടിയതും ഒരു പക്ഷെ മുട്ടത്തുവർക്കിയുടെ നോവലിലൂടെയായിക്കൂടെന്നുമില്ല.  

പ്രായം കൂടുന്നതിനനുസരിച്ച് സഞ്ചാരസ്വാതന്ത്ര്യത്തിനും അയവുണ്ടായി.

സൈക്കിൾ പഠിച്ചു . കുഞ്ഞിപ്പള്ളിക്കടുത്ത് ചിറയിപ്പീടികയിൽ നവോദയവായനശാല എന്നൊന്നുണ്ടായിരുന്നു. കെ കെ എൻ കുറുപ്പിന്റേയും ഇ.എം നാണുമാസ്റ്റരുടെയും മറ്റും നേത്രുത്വത്തിലായിരുന്നു ഈ വായനശാലയുടെ തുടക്കം .

വായനശാലയോട് ചേർന്ന് കണാരേട്ടന്റെ ചായപ്പീടിക. വൈകുന്നേരങ്ങളിൽ സൈക്കിളിൽ അവിടെപ്പോയി പുസ്‌തകമെടുക്കുമായിരുന്നു .

വർഷങ്ങളോളം .സാമാന്യം നല്ല ഉയരമുള്ള കണാരേട്ടൻ സദാ ചിരിച്ചുകൊണ്ടായിരിക്കും കുട്ടികളായ ഞങ്ങളോടെല്ലാം പെരുമാറിയിരുന്നത് . ഉന്മേഷം തുളുമ്പുന്ന മുഖം . പുസ്തകങ്ങൾ തെരഞ്ഞെടുത്തു തരുന്നതിലും അദ്ദേഹം സഹായിക്കും .

നല്ലനല്ല പുസ്‌തകങ്ങൾ വായിക്കാൻ കണാരേട്ടൻ നിമിത്തമായിട്ടുണ്ടെന്നു പറയാതെ വയ്യ .ഈ വായനാ ദിനത്തിൽ നന്ദിയോടെ ഞാൻ അദ്ദേഹത്തെ സ്‌മരിക്കുന്നു .  

ചോമ്പാൽ ബീച്ചിലുള്ള പുരോഗമന വായനശാലയിലും പോകുമായിരുന്നു അക്കാലങ്ങളിൽ .സൈക്കിൾയാത്രയുടെ ഒരു സുഖവും ഇതിന്റെ പിന്നിലില്ലാതല്ല . 

വായനശാലയിൽ പോകുന്ന കാര്യത്തിൽ വീട്ടിലെ വിലക്കിന് അൽപ്പം അയവുണ്ടാകുമായിരുന്നു .കണ്ണൂക്കരയിലും സൈക്കിളിൽ പോകും .കണ്ണൂക്കര കലാസമിതി എന്ന വായനശാലയിൽ .

കൃഷ്‌ണൻ എന്നൊരാളായിരുന്നു പുസ്തകം എടുത്തുതരിക .ചന്തു മാസ്റ്റർ എന്നൊരാളും ഇടക്കവിടെ കാണും .വർഷങ്ങൾക്കുശേഷം മുക്കാളി റെയിൽവേ സ്റ്റേഷനടുത്തുള്ള മഹാത്മാവായനശാലയുമായിട്ടായി പിന്നെ കൂടുതൽ അടുപ്പം.

കുഞ്ഞാമൻ എന്നൊരാളായിരുന്നു അവിടെ നിന്നും പുസ്‌തകമെടുത്തുതന്നിരുന്നത് .

നാട്ടിൽ റേഡിയോ വേണ്ടത്രയില്ലാത്ത കാലം .വൈകുന്നേരങ്ങളിൽ സിലോൺ റേഡിയോവിൽനിന്നും കേൾക്കുന്ന ഏതാനും മലയാളചലച്ചിത്ര ഗാനങ്ങൾ കേൾക്കാനും വാർത്തകൾ കേൾക്കാനും മഹാത്മാ വായനശാലയുടെ വരാന്തയിൽ കെട്ടിയുയർത്തിയ ഇരുത്തിയിലിലിരിക്കും .

ഇന്നത്തെ ചോമ്പാലയിലെ പ്രമുഖ വ്യക്തിത്വമായ മുല്ലപ്പള്ളി രാമചന്ദ്രൻ ,പട്യാട്ട് ഗംഗാധരൻ പണിക്കർ ,കൂടക്കന്റവിടെ ശ്രീധരൻ ,ചാത്തോത്ത് മീത്തൽ ശ്രീധരൻ പ്രമുഖ എഴുത്തുകാരനും പത്രപ്രവർത്തക കനുമായിരുന്ന ഇ .വി .ശ്രീധരൻ .മുൻ മന്ത്രി എ . സി .ഷൺമുഖദാസ് തുടങ്ങിയ ഒരുകൂട്ടം യുവാക്കളുടെ സംഗമസ്ഥലംകൂടിയായിരുന്നു മഹാത്മാവായനശാല .ഇവരിൽ പലരുമിന്നില്ല .

ഇടയ്ക്ക് വൈകുന്നേരങ്ങളിൽ വെറുതെ നടക്കാനിറങ്ങും.ഒന്നുകിൽ കുഞ്ഞിപ്പള്ളി മൈതാനംവരെ .അല്ലെങ്കിൽ അണ്ടിക്കമ്പനിക്കപ്പുറം വരെ .

ഇന്നുകാണുന്ന വലിയവീടുകളൊന്നുമില്ലാത്ത അവിടങ്ങളിലെ മണൽപ്പരപ്പിൽ വെറുതെയിരുന്ന് തമാശകളും നേരമ്പോക്കുമായി സമയംകളഞ്ഞ ഒരുകാലവും മഹാത്മാവായനശാലയുമായി ബന്ധിപ്പിച്ച് പറയാനുണ്ട് .

മുതിർന്നു വലുതായി വർഷങ്ങൾക്കു ശേഷം ചോമ്പാൽ പാതിരിക്കുന്നിലെ മിഷ്യൻ കോമ്പൗണ്ടിൽ പുതിയവീട് വെച്ച് മാറിത്താമസിച്ചപ്പോൾ തൊട്ടടുത്തവീട്ടുകാരൻ കുടുംബാംഗം കൂടിയായ എം എം അനന്തൻ എന്ന ആൾ .

ശരിക്കും പുസ്‌തക ഭ്രാന്തൻ .വിവിധവിഷയങ്ങളെക്കുറിച്ചുള്ള ധാരാളം ബുക്കുകൾ വീട്ടിൽ സൂക്ഷിക്കുന്നതുൽ സന്തോഷം കണ്ടെത്തിയിരുന്ന ഒന്നാംതരം വായനക്കാരൻ കൂടിയായിരുന്നു അദ്ദേഹം . അദ്ദേഹത്തിന്റെബ് പ്രോത്സാഹനത്തിൽ ഒരുകൂട്ടം പുസ്‌തകങ്ങൾ സാമാന്യം നല്ല വിലകൊടുത്ത് ഞാനും വാങ്ങിയിരുന്നു .

ഒഴിവ് കിട്ടുമ്പോഴെല്ലാം അദ്ദേഹത്തിനടുത്തു പോയിരിക്കും .വായനാനുഭവങ്ങൾ പങ്കുവെക്കും . അമ്പതും അറുപതും വർഷങ്ങൾക്ക് മുൻപുള്ള പ്രധാനസംഭവങ്ങളെക്കുറിച്ചുള്ള പത്രക്കട്ടിംഗുകളുടെ മഹാശേഖരം തന്നെയായിരുന്നു എം എം അനന്തൻ എന്ന മനുഷ്യന്റെ വേറിട്ട സമ്പാദ്യം .

നിരവധി ചാനലുകളിലും വാർത്താമാധ്യമങ്ങളിലും ഈ വിഷയുവുമായി ബന്ധപ്പെട്ട് നിറഞ്ഞു നിന്നിരുന്ന അനന്തേട്ടൻറെ വേർപാടിന്‌ശഷം ദീർഘകാലം അടച്ചിടേണ്ടിവന്ന അദ്ദേഹത്തിൻറെ വീട്ടിൽ നിന്നും അദ്ദേഹത്തിന്റെ തിരുശേഷിപ്പുകൾ പോലുള്ളപുസ്‌തകങ്ങൾ ബഹുഭുരിഭാഗവും പത്രക്കട്ടിംഗുകളടക്കം ചിതലരിച്ചു നശിച്ചുപോയത് ദുഃഖസ്‌മൃതികളോടെ ഈ വായനാദിനത്തിൽ ഞാൻ ഓർത്തുപോകുന്നു .