കടത്തനാട് കളരി സംഘത്തിൻ്റെ 76-ാം വാർഷിക കളരി പരിശീലനം ആരംഭിച്ചു; നടി രേവതി ഉദ്ഘാടനം ചെയ്തു

ഉദ്ഘാടന പ്രസംഗത്തിൽ, ബ്രിട്ടീഷ് വിദ്യാഭ്യാസ സമ്പ്രദായം വരുന്നതിന് മുൻപ് കളരി നമ്മുടെ വിദ്യാഭ്യാസത്തിൻ്റെ അവിഭാജ്യ ഘടകമായിരുന്നുവെന്ന് രേവതി പറഞ്ഞു.

കുട്ടികളുടെ ജീവിതത്തിൽ കളരിക്ക് പ്രധാന ഇടം നൽകി അവരെ സ്വയംപര്യാപ്തരാക്കണമെന്നും, ഏത് രാത്രിയിലും തനിച്ചു നടക്കാനുള്ള ധൈര്യം കളരിയിലൂടെ കുട്ടികൾക്ക് ലഭിക്കണമെന്നും അവർ ഊന്നിപ്പറഞ്ഞു.

തനിക്ക് കളരി പഠിക്കാൻ ആഗ്രഹമുണ്ടായിരുന്നെങ്കിലും അത് പൂർത്തിയാക്കാൻ സാധിച്ചില്ലെന്നും രേവതി വെളിപ്പെടുത്തി. 75 വർഷത്തോളം കളരിയെ മുന്നോട്ട് കൊണ്ടുപോയത് ചെറിയ കാര്യമല്ലെന്ന് അവർ പറഞ്ഞ.

ഈ ആയോധനകല എങ്ങനെ കൂടുതൽ പേരിലേക്ക് എത്തിക്കണമെന്നും, കളരി ആചാര്യന്മാരുടെ അർപ്പണബോധം നാം മാതൃകയാക്കണമെന്നും ഓർമ്മിപ്പിച്ചു.

ദേശീയ കളരിപ്പയറ്റ് ചാമ്പ്യൻഷിപ്പിൽ വിജയിച്ചവരെ ചടങ്ങിൽ അനുമോദിച്ചു. യു.എൽ. റിസർച്ച് ഡയറക്ടർ ഡോ. സന്ദേശ് സ്വാഗതം ആശംസിച്ചു. വടകര നഗരസഭ വൈസ് ചെയർപേഴ്സൺ സതീശൻ മാസ്റ്റർ അധ്യക്ഷത വഹിച്ചു. പ്രീതി എം, പത്മനാഭൻ കണ്ണങ്കുഴി, വി.കെ. വിനു, എ.പി. മോഹനൻ എന്നിവർ ആശംസകൾ അർപ്പിച്ച് സംസാരിച്ചു. ആദിത്യ ഗോവിന്ദ് നന്ദി പറഞ്ഞു.