നെടുങ്കണ്ടം കബഡി പ്രീമിയർ ലീഗിന് ആവേശത്തുടക്കം

നെടുങ്കണ്ടം: കബഡി പ്രീമിയർ ലീഗിന് നെടുങ്കണ്ടം സിന്തറ്റിക് സ്റ്റേഡിയത്തിൽ ആവേശത്തുടക്കം. ദക്ഷിണേന്ത്യയിലെ 25-ഓളം ടീമുകളാണ് മത്സരങ്ങളിൽ പങ്കെടുക്കുന്നത്. നെടുങ്കണ്ടം സ്പോർട്‌സ് അസോസിയേഷനാണ് (എൻഎസ്എ) ടൂർണമെന്റ് സംഘടിപ്പിക്കുന്നത്.

കേരളത്തിൽനിന്നും തമിഴ്‌നാട്ടിൽനിന്നുമുള്ള കബഡി ടീമുകളാണ് മാറ്റുരയ്ക്കുന്നത്. മത്സര വിജയികൾക്ക് ഒന്നാം സമ്മാനമായി 20,000 രൂപ കാഷ് അവാർഡും ഡോ. എ.വി. ജോസഫ് മെമ്മോറിയൽ എവറോളിങ് ട്രോഫിയും രണ്ടാം സമ്മാനമായി 15,000 രൂപയും ട്രോഫിയും മൂന്നാം സമ്മാനമായി 10,000 രൂപയും ട്രോഫിയും സമ്മാനിക്കും.

ടൂർണമെന്റ് ബ്ലോക്ക് പഞ്ചായത്ത് പ്രസിഡൻ്റ് കെ.ടി. കുഞ്ഞ് ഉദ്ഘാടനം ചെയ്തു.

പ്രോഗ്രാം കൺവീനർ ഈട്ടിക്കൽ ശിഹാബിൻ്റെ അധ്യക്ഷതയിൽ ചേർന്ന പൊതുയോഗത്തിൽ പഞ്ചായത്ത് പ്രസിഡൻ്റ് പ്രിമി ലാലിച്ചൻ, എൻഎസ്എ സി സൈജു ചെറിയാൻ, ഡയറക്‌ടർ ബോർഡ് അംഗങ്ങളായ റെയ്‌സൺ പി. ജോസഫ്, രമേഷ് കൃഷ്‌ണൻ, കബഡി ക്ലബ്ബ് അംഗങ്ങളായ ബിബിൻ ലാൽ, സുശാന്ത് ശിവദാസ്, കിഷോർ ഗോപിനാഥ് എന്നിവർ നേതൃത്യത്വം നൽകി.