വയനാട് ക്രിക്കറ്റ് കാർണിവൽ: വൈഎസ്‌എ ചെതലയം ചാമ്പ്യൻമാർ

അഗ്നിവർഷക് കോളിയാടി റണ്ണേഴ്‌സപ്പ്

കല്പറ്റ: പ്രാദേശികടീമുകളെ അണിനിരത്തി ഐപിഎൽ മാതൃകയിൽ അരങ്ങേറിയ വയനാട് ക്രിക്കറ്റ് കാർണിവലിൽ (ഡബ്ല്യുസിസി) കപ്പുയർത്തി വൈഎസ്എ ചെതലയം. 7.3 ഓവറിൽ രണ്ടുവിക്കറ്റ് നഷ്‌ടത്തിൽ 111 റൺസെടുത്ത് അഗ്നിവർഷക് കോളിയാടിയെ പരാജയപ്പെടുത്തിയാണ് വൈഎസ്എ ചെതലയം ചാമ്പ്യൻമാരായത്. അഗ്നിവർഷക് കോളിയാടി എട്ട് ഓവറിൽ മൂന്ന് വിക്കറ്റ് നഷ്ട‌ത്തിൽ 110 റൺസാണ് എടുത്തത്.

സൺഡേ ഷെയർ തോണിച്ചാൽ മൂന്നാംസ്ഥാനവും ടൗൺ ടീം കല്പറ്റ നാലാംസ്ഥാനവും നേടി. മത്സരത്തിൽ മികച്ച ബാറ്ററായി അഗ്നിവർഷക് കോളിയാടിയിലെ അപ്പു കോളിയാടിയെയും മികച്ച ബൗളറായി സൺഡേ ഷെയർ തോണിച്ചാലിലെ രാകേഷിനെയും മികച്ച വിക്കറ്റ് കീപ്പറായി അഗ്നിവർഷകിലെ സനീഷ് കൂട്ടാറയെയും തിരഞ്ഞെടുത്തു. വൈഎസ്എ ചെതലയത്തിലെ ടിമ്മിനാണ് മത്സരത്തിലെ മോസ്റ്റ് വാല്യുബിൾ പ്ലയർ. എമർജിങ് പ്ലയറായി അഗ്നിവർഷകിലെ സജിത് അപ്പുവിനെയും തിരഞ്ഞെടുത്തു. ചാമ്പ്യൻമാരായ വൈഎസ്എ ചെതലയത്തിന് ഒരുലക്ഷം രൂപയും റണ്ണേഴ്സ‌പ്പായ അഗ്നിവർഷക് കോളിയാടിക്ക് 50,000 രൂപയും മൂന്നാം സ്ഥാനക്കാരായ സൺഡേ ഷെയർ തോണിച്ചാലിന് 30,000 രൂപയും നാലാം സ്ഥാനക്കാരായ ടൗൺ ടീം കല്പറ്റയ്ക്ക് 20,000 രൂപയും കാഷ് പ്രൈസ് നൽകി. മികച്ച കളിക്കാർക്ക് ട്രോഫികളും സമ്മാനിച്ചു.

ഐപിഎൽ മാതൃകയിൽ ലേലം

ഐപിഎൽ മാതൃകയിൽ വയനാട്ടിലെയും എരുമാടിലെയും പ്രദേശികതാരങ്ങളെ പോയിന്റ് ലേലത്തിനെടുത്താണ് ടീമുകൾ മത്സരത്തിനിറങ്ങിയത്. 12 ടീമുകളാണ് മത്സരത്തിൽ മാറ്റുരച്ചത്. ബ്രദേഴ്‌സ് കല്പറ്റ, റൈസിങ് സ്റ്റാർ കല്പറ്റ, ജനതാ ചൂതുപാറ, റോയൽ ഹീറോസ് കല്പറ്റ, ജെകെ സ്റ്റൈക്കേഴ്‌സ്, സംസ്ക‌ാര പടിഞ്ഞാറത്തറ, എഫ്‌സിഎം കല്പറ്റ, ലെജൻഡ് മീനങ്ങാടി എന്നിവയാണ് മത്സരത്തിൽ മാറ്റുരച്ച മറ്റുടീമുകൾ. മുട്ടിൽ ഡബ്ല്യുഎംഒ കോളേജ് ഗ്രൗണ്ടിലെ ഫ്ലഡ്‌ലിറ്റിലായിരുന്നു മത്സരങ്ങൾ.

കല്പറ്റ ആസ്ഥാനമായുള്ള ക്രിക്കറ്റ് ക്ലബ്ബായ ക്രിക്മേറ്റ്സാണ് വയനാട് ക്രിക്കറ്റ് കാർണിവൽ സംഘടിപ്പിച്ചത്. പ്രാദേശിക ക്രിക്കറ്റ് മത്സരങ്ങളിലൂടെ താരങ്ങളെ വളർത്തുകയെന്ന ലക്ഷ്യത്തോടെ കല്പറ്റയിലെ ഒരുകൂട്ടം ചെറുപ്പക്കാർ ചേർന്ന് രൂപവത്കരിച്ച കൂട്ടായ്‌മയാണ് ക്രിക്മേറ്റ്സ്. ക്രിക്‌ക്മേറ്റ്സിന്റെ നേതൃത്വത്തിൽ കല്പറ്റ ക്രിക്കറ്റ് പ്രീമിയർ ലീഗ് മൂന്ന് സീസണുകൾ പൂർത്തിയാക്കിയതോടെ കിട്ടിയ മികച്ചപ്രതികരണമാണ് വയനാട് ക്രിക്കറ്റ് കാർണിവൽ എന്ന ആശയത്തിലെത്തിയത്.

ഹാർഡ് ടെന്നീസ് ബോളിൽ വയനാട്ടിൽ ആദ്യമായി നടന്ന ഫ്ലഡ്‌ലിറ്റ് പ്രീമിയർ ലീഗ് കൂടിയായിരുന്നു വയനാട് (ക്രിക്കറ്റ് കാർണിവൽ.