താരങ്ങളുടെ മിന്നുംപ്രകടനവുമായി വയനാട് ക്രിക്കറ്റ് കാർണിവൽ

മുട്ടിൽ: പ്രാദേശിക ടീമുകളുടയും കളിക്കാരുടെയും മിന്നുംപ്രകടനവുമായി വയനാട് (ക്രിക്കറ്റ് കാർണിവൽ. (ക്രിക്കറ്റ് പ്രേമികളെ ആവേശത്തിലാക്കുന്ന തരത്തിലായിരുന്നു കഴിഞ്ഞദിവസങ്ങളിലെ മത്സരങ്ങളെല്ലാം. എട്ട് ഓവർ വീതമുള്ള മത്സരങ്ങളിൽ മികച്ച പോരാട്ടമായിരുന്നു ഓരോ ടീമും കാഴ്‌ചവെച്ചത്.

ഞായറാഴ്ച്‌ച രാത്രിവൈകിയാണ് സെമിഫൈനൽ, ഫൈനൽ മത്സരങ്ങൾ നടന്നത്. ഐപിഎൽ മാതൃകയിൽ വയനാട്ടിലെയും എരുമാടിലെയും ക്രിക്കറ്റ് താരങ്ങളെ ഓരോ ടീമുകളും പോയിന്റ് അടിസ്ഥാനത്തിൽ ലേലത്തിനെടുത്താണ് മത്സരത്തിനിറക്കുന്നത്. 12 ടീമുകളാണ് മത്സരത്തിൽ മാറ്റുരച്ചത്. ടൗൺ ടീം കല്പറ്റ, ബ്രദേഴ്സ‌് കല്പറ്റ, വൈഎസ്എ ചെതലയം, റൈസിങ് സ്റ്റാർ കല്പറ്റ, സൺഡേ ഷെയർ തോണിച്ചാൽ, ജനതാ ചൂതുപാറ, റോയൽ ഹീറോസ് കല്പറ്റ, ജെകെ സ്റ്റൈക്കേഴ്‌സ്, സംസ്‌കാര പടിഞ്ഞാറത്തറ, എഫ്‌സിഎം കല്പറ്റ, അഗ്നിവർഷക് കോളിയാടി, ലെജൻഡ് മീനങ്ങാടി എന്നീ ടീമുകളാണ് മത്സരത്തിൽ ഏറ്റുമുട്ടിയത്.

ഹാർഡ് ടെന്നീസ് ബോളിൽ വയനാട്ടിൽ ആദ്യമായി നടന്ന ഫ്ലഡ്‌ ലറ്റ് പ്രീമിയർ ലീഗാണ് വയനാട് ക്രിക്കറ്റ് കാർണിവൽ. പ്രാദേശിക ക്രിക്കറ്റ് താരങ്ങളെ അണിനിരത്തി കല്പറ്റ ആസ്ഥാനമായുള്ള ക്രിക്കറ്റ് ക്ലബ്ബായ ക്രിക്മേറ്റ്സാണ് വയനാട് ക്രിക്കറ്റ് കാർണിവൽ സംഘടിപ്പിക്കുന്നത്.

ക്രിക്മേറ്റ്സിന്റെ നേതൃത്വത്തിൽ കല്പറ്റ ക്രിക്കറ്റ് പ്രീമിയർ ലീഗ്, മൂന്ന് സീസണുകൾ പൂർത്തിയാക്കിയതോടെ കിട്ടിയ മികച്ച പ്രതികരണമാണ് വയനാട് ക്രിക്കറ്റ് കാർണിവൽ എന്ന ആശയത്തിലെത്തിയത്.