പ്രകൃതിഭംഗിയും ആധുനികതയും ഇവിടെ ഒരു കുടക്കീഴിൽ...

കോഴിക്കോട്: കണ്ണൂരിൻ്റെ ആത്മാവായ തെയ്യം, പ്രകൃതിരമണീയത മുറ്റിനിൽക്കുന്ന ദൃശ്യവൈവിധ്യം, ആശയസമ്പന്നമായ ആധുനിക ചിത്രകല, ആഴമേറിയ ചിന്തയ്ക്ക് വഴിവെക്കുന്ന വർണചിത്രങ്ങൾ പെൻസിൽ സ്കെച്ചുകൾ. ലളിതകലാ അക്കാദമി ആർട്ട്ഗാലറിയിൽ ചൊവ്വാഴ്ച ആരംഭിച്ച 'ആർടോവ' ചിത്രപ്രദർശനത്തിൽ ഇവയെല്ലാം ഒരുകുടക്കീഴിൽ അണിചേരുകയാണ്.

ആറുനാൾ നീളുന്ന ചിത്രപ്രദർശനം ഒരുക്കിയത് കണ്ണൂർ ആലക്കോട്ടുള്ള ഷാരോൺ സ്കൂ‌ൾ ഓഫ് ആർട്സാണ്. ഷാരോണിൽ ചിത്രകല അഭ്യസിക്കുന്ന ബാച്ചിലെ 12 പേരുടെ 118 ചിത്രങ്ങളാണ് പ്രദർശനത്തിൽ ഇടംനേടിയത്. ജലച്ചായം, പെൻസിൽസ്കെ‌ച്ച്, അക്രിലിക്, ചാർക്കോൾ എന്നീ മാധ്യമങ്ങളിലൂടെ സാക്ഷാത്‌കരിച്ച ചിത്രങ്ങളാണ് ഇവയെല്ലാം.

കെ. വർഷ, ശില്പാ മോഹൻ, മുഹമ്മദ് ആഷിക്ക്, രഞ്ജിമ, എം. അഭിനവ്, നിതിൻ നാരായണൻ, ശ്രീജ ബിജു, യദുൽ ആന്റണി, അൽവിയ ആൻ്റണി, രോഹിത് രാജേഷ്, മൃദുൽ ആന്റണി, എഡ്വിൻ തോമസ് എന്നിവരുടെ രചനകളാണ് പ്രദർശനത്തിലുള്ളത്.

ഇതിൽ ശ്രീജ വീട്ടമ്മയും എഡ്വിൻ എട്ടാംക്ലാസ് വിദ്യാർഥിയുമാണ്. മറ്റുള്ളവരെല്ലാം പ്ലസ്സു‌ കഴിഞ്ഞവരാണ്. ആലക്കോടിന്റെ പരിസരപ്രദേശങ്ങളിൽനിന്നുള്ളവരാണ് ഇവരെല്ലാം.

ഗ്രാമപ്രദേശങ്ങളിലെ കലാപ്രതിഭകളെ കണ്ടെത്തി ദേശീയ-അന്തർദേശീയ തലത്തിലേക്കുയർത്തുന്ന ദൗത്യത്തിലാണ് സ്ഥാപനമെന്ന് പ്രിൻസിപ്പൽ എബിൻ പോത്തേരയും ചെമ്പേരി നിർമല ഹയർസെക്കൻഡറി സ്‌കൂളിലെ ചിത്രകലാധ്യാപകൻ ഷാജിതോമസും പറഞ്ഞു. ആർട്ടിസ്റ്റ് മദനൻ പ്രദർശനം ഉദ്ഘാടനം ചെയ്തു.